Германияның Сыртқы істер министрі Йоханн Вадефуль жұма күні Анкараға ресми сапары қарсаңында берген сұхбатында Германияның Түркияны НАТО аясында «стратегиялық әріптес» ретінде көретінін және сыртқы саясат саласындағы ынтымақтастықтың зор әлеуетке ие екенін айтты.
Вадефульдің бір күндік Анкара сапары барысында Түркия Сыртқы істер министрі Хакан Фиданмен халықаралық және өңірлік маңызды мәселелер бойынша кең көлемді келіссөздер жүргізуі күтілуде. Кездесуде екіжақты қатынастар, Түркия–ЕО байланыстарының қазіргі жағдайы, қорғаныс өнеркәсібіндегі ынтымақтастық және НАТО мәселелері талқыланбақ.
Берлинде журналистерге мәлімдеме жасаған Вадефуль Анкарадағы келіссөздердің Таяу Шығыстағы оқиғаларды, Газа бітімін, Сирияның саяси өтпелі кезеңін, Ресей–Украина қақтығысын және өзге де сыртқы саясат тақырыптарын қамтитынын атап өтті.
Таяу Шығыстағы қақтығыс туралы сөз еткен Вадефуль АҚШ президенті Дональд Трамптың 20 тармақтан тұратын жоспарына негізделген Хамас–Израиль бітіміне сілтеме жасап, «Түркия тарихи Газа бітіміне араағайын болып, маңызды үлес қосты», - деді.
Германия Сыртқы істер министрі сондай-ақ: «Тұтқындардың босатылуы және бітімнің жүзеге асуымен бірге, бірнеше апта бұрын мүмкін емес болған көптеген нәрсе орындалды, бірақ Газа халқы үшін қауіпсіз болашақ құру жұмыстары енді ғана басталды», – деді.
Ол гуманитарлық ұйымдардың ең ауыр қиындықтарды жеңілдету үшін жұмыс істеп жатқанын және ұзақ мерзімді бейбітшілік үшін 20 тармақтық жоспардың толық орындалуын бірлесе қамтамасыз етуге тырысатынын айтты.
Вадефуль сөзінің соңында: «Түркия – НАТО одағындағы біздің негізгі стратегиялық серіктесіміз», – деп атап өтіп, түрік әріптесімен өтетін келіссөздердің аймақтық және халықаралық қауіпсіздік мәселелерін, сондай-ақ Ресей–Украина соғысындағы соңғы оқиғаларды қамтитынын жеткізді.
Ол сондай-ақ: «Біздің ортақ мақсатымыз – бұл соғысты мүмкіндігінше тез аяқтау. Осы мақсатта Ресейдің соғысқа пайдаланатын қаржы көздерін жылдам тоқтатуымыз керек. Монтрё конвенциясының сақтаушысы ретінде Түркия Қаратеңізге кіру мәселесінде тікелей жауапкершілікке ие. Стамбул келіссөздер үшін маңызды орын», – деді.
Сонымен қатар Германия Түркияның қорғаныс өнеркәсібіне инвестицияларды ұлғайтуды көздейтін Еуропалық Одақтың 150 миллиард еуролық «Еуропа қауіпсіздігіне арналған іс-қимыл бағдарламасына» (SAFE) қатысуын қолдайтынын растады.
Грекия премьер-министрі Кириакос Мицотакис Түркияның бағдарламаға қосылуына қарсы екенін мәлімдеген болатын, алайда Вадефуль Мицотакисті кедергі келтірмеуге шақырды.
«SAFE» бағдарламасы аясында несие алуға өтінім берудің мерзімі 30 қарашаға дейін жалғасады, ал Мицотакис бұған дейін Копенгагенде өткен Еуропалық саяси қауымдастық саммиті шеңберінде Германия канцлері Фридрих Мерц және Түркияның қатысуын қолдаған НАТО бас хатшысы Марк Рюттемен кездескен болатын.
