2 қазан күні Копенгагенде жоспарланған Еуропалық саяси қауымдастықтың жетінші саммиті алдында Дания ел аумағында барлық азаматтық ұшқышсыз әуе аппараттарының ұшуына тыйым салуда. Көлік министрлігі бұл шешімнің қауіпсіздік мақсатында қабылданғанын хабарлады.
22 қыркүйектен бері Данияда бірнеше белгісіз ұшқышсыз әуе аппаратының көрінуі бірнеше әуежайдың жабылуына себеп болды. Дания билігі бұл оқиғаларға Ресейдің қатысы барын меңзеді, алайда Мәскеу айыптауларды жоққа шығарды.
Көлік министрі Томас Даниельсен мәлімдемесінде: «Дания алдағы апта ЕО көшбасшыларын қабылдайды, сондықтан қауіпсіздікке ерекше назар аударамыз. Дүйсенбіден жұмаға дейін барлық азаматтық ұшқышсыз әуе аппараттарының Дания әуе кеңістігінде ұшуына тыйым саламыз. Осылайша белгісіз әуе аппараттарының заңды әуе аппараттармен шатастырылу қаупін жоямыз», - деді.
Тыйым қауіпсіздік органдарына қолдау көрсетеді
Әділет министрі Питер Хуммельгорд осы мәлімдемеде тыйымның мақсаты полиция
мен өзге де органдардың жұмысын жеңілдету екенін айтты.
Хуммельгорд: «Полиция жоғары дайындық жағдайында, ал біздің қауіпсіздік органдарымыз күштерін ел халқы мен қонақтарымызға жұмсауы тиіс», - деді.
Министрдің айтуынша, бұл шектеу полицияның қауіпсіздік пен қоғамдық тәртіпке қауіп төндірмейтін азаматтық ұшқышсыз әуе аппараттарымен айналысуына жол бермейді.
Дания полициясы сенбі күні жасаған мәлімдемесінде, халықтан 500-ден астам ұшқышсыз әуе аппаратының ұшырылуы туралы хабарлама алғандарын, бірақ олардың басым бөлігі айтарлықтай маңызды болмағанын жеткізді.
