Израиль армиясы Халықаралық Қызыл Крест комитетінің Газада төрт израильдік тұтқынның мәйітін қабылдап, оларды Израиль күштеріне жеткізгенін хабарлады. Израиль армиясының мәлімдемесінде: «Қызыл Крест ұсынған мәліметке сәйкес, төрт табыттағы тұтқындардың мәйіті қабылданып, Израиль армиясы мен қауіпсіздік агенттігіне жөнелтілді», - делінген.
Бұған дейін армия Қызыл Кресттің бірнеше израильдік тұтқынның мәйітін алу үшін Газаның солтүстігінде белгіленген орынға бет алғанын хабарлаған болатын. Палестиналық тарап дүйсенбі күні Газадағы бітім келісімі аясында төрт израильдік тұтқынның мәйітін тапсырды. Сондай-ақ ХАМАС бітім келісімінің алғашқы кезеңі бойынша дүйсенбі күні таңертең шамамен 2000 палестиналық тұтқынға айырбас ретінде 20 тірі израильдік тұтқынды босатты.
Өткен апта АҚШ президенті Дональд Трамп Израиль мен ХАМАС-тың 29 қыркүйекте жарияланған жоспардың алғашқы кезеңін қабылдағанын мәлімдеген болатын. Бұл жоспар Газада бітім орнату, тұтқын алмасу және Израиль армиясын аймақтан біртіндеп шығару тармақтарын қамтиды. Жоспардың алғашқы кезеңі жұма күні күшіне енді.
АҚШ шенеуніктерінің айтуынша, екінші кезеңде Газада жаңа басқару жүйесін құру, көпұлтты қауіпсіздік күшін қалыптастыру және ХАМАС-ты қарусыздандыру көзделген. Қызыл Крест әзірге мәйіттердің қабылданғанын растайтын мәлімдеме жасаған жоқ.
Бұл тұтқын алмасу Катар мен Мысырдың араағайындығымен бірнеше апта бойы жүргізілген қарқынды келіссөздер нәтижесінде жүзеге асты, ал Вашингтон бітімнің алғашқы кезеңінен кейін бітім келісімін кеңейтуге бағытталған келіссөздерге қатысуда.
Израиль армиясы мәйіттер отбасыларына тапсырылмас бұрын сәйкестендіру рәсімдері жүргізілетінін атап өтті.
