Мысыр, Катар және Түркия АҚШ президенті Дональд Трамппен бірге Газа бітім келісіміне байланысты құжатқа қол қойды.
Дүйсенбі күні Мысырдың Қызыл теңіз жағалауындағы Шарм-эль-Шейх қаласында өткен халықаралық саммит барысында құжатқа қол қойылды.
Трамп Израиль мен ХАМАС тұтқын алмасуынан бірнеше сағат өткен соң, Газадағы атысты тоқтатуды нығайтуға бағытталған декларацияның қабылдануын «Таяу Шығыс үшін ұлы күн» деп атады.
Саммитке қатысқан жиырмадан астам ел басшысының алдында сөз сөйлеген Трамп: «Әлем үшін ұлы күн, Таяу Шығыс үшін ұлы күн», - деді. Құжатқа қол қоймас бұрын Трамп: «Бұл құжат ережелерді, тәртіптерді және басқа да көптеген жайттарды анықтайды», - деді. Сондай-ақ екі рет: «Бұл құжат өз күшін сақтайды», - деді.
Газа қаласын қайта жаңғырту конференциясы
Мысыр президенті Абдул Фаттах әл-Сиси Газаны қайта қалпына келтіру жөніндегі конференцияның Мысырда өтетінін мәлімдеді. Ол: «Мысыр алдағы күндері серіктестермен үйлестіру негізінде АҚШ-пен бірлесіп, Газаны қайта қалпына келтірудің іргетасын қалайды. Қалпына келтіру, қайта құру және даму жөнінде конференция өткізуді жоспарлап жатырмыз», - деді.
Сиси сондай-ақ Газа жөніндегі келісімнің адамзат тарихындағы ауыр кезеңді аяқтағанын және Таяу Шығыс үшін бейбітшілік пен тұрақтылықтың жаңа дәуірін бастағанын атап өтті. Ол бұл келісімді екі мемлекет негізіндегі шешімге жол ашқан тарихи күн деп сипаттады.
