Иран Сыртқы істер министрлігі АҚШ күштерінің Иран порттарына қойылған блокаданы бұзуға әрекет жасады делінген жүк кемесін басып алуын айыптады.
Министрлік сейсенбі күні жасаған мәлімдемесінде: «Иран Ислам Республикасы Сыртқы істер министрлігі АҚШ-тың “террористік армиясының” жексенбі күні Иранның “Touska” сауда кемесіне қарсы жасаған заңсыз әрі күш қолданылған шабуылын қатаң айыптайды», — деді.
Мәлімдемеде бұл оқиға «теңіз қарақшылығы мен террорлық әрекеттің бір түрі» деп сипатталып, оның халықаралық құқықты, сондай-ақ 7 сәуірде басталған АҚШ-пен екі апталық бітімді бұзғаны айтылды.
Министрлік Иран туы тағылған кемемен бірге оның экипажын және отбасы мүшелерін де босатуды талап етті.
Мәлімдемеде: «Иран Ислам Республикасы ұлттық мүдделері мен қауіпсіздігін қорғау және ирандықтардың құқықтары мен ар-намысын сақтау үшін барлық мүмкіндігін пайдаланатыны сөзсіз», - делініп, «шиеленістің одан әрі ушығуы» үшін жауапкершілік АҚШ-қа жүктелетіні атап өтілді.
АҚШ Орталық қолбасшылығы (CENTCOM) жексенбі күні АҚШ әскери-теңіз күштерінің блокада нұсқауларына бағынудан бас тартты делінген Иран туы тағылған “Touska” жүк кемесін Оман шығанағында басып алғанын хабарлаған еді.
