Түрік Әуе жолдары жұма күні жасаған мәлімдемесінде 75 дана «Boeing B787» ұшағын сатып алатынын және қозғалтқыш өндірушісі «CFM International» компаниясымен келіссөздер негізінде 150 дана «737-8/10 MAX» ұшағын сатып алу бойынша келісімге келгенін хабарлады.
Түркиядағы жалғыз қор нарығы және қаржы активтері саудаланатын Стамбул қор биржасына жасаған мәлімдемеде, Түрік Әуе жолдарының «Boeing» компаниясынан 75 дана «B787-9» және «B787-10» үлгісіндегі ұшақ сатып алуға шешім қабылдағаны айтылды. Сондай-ақ 50 данасы нақты, 25-і қосымша тапсырыс ретінде жоспарланғаны атап өтілді.
Компания бұл ұшақтардың жеткізілімі 2029 - 2034 жылдар аралығында жүзеге асырылатынын мәлімдеді. Ұшақтардың қозғалтқыштары, қосалқы қозғалтқыштары және қозғалтқыштарға техникалық қызмет көрсету мәселелері бойынша «Rolls-Royce» және «GE Aerospace» компанияларымен келіссөздер жүргізіліп жатқаны хабарланды.
Сонымен қатар Түрік Әуе жолдары «Boeing»-пен жалпы саны 150 дана «737-8/10 MAX» үлгісіндегі ұшақ сатып алу бойынша келіссөздерді аяқтағанын растады. Бұл тапсырыстардың 100 данасы нақты, 50 данасы қосымша тапсырыс ретінде жоспарланған.
Компания мәлімдемесінде «Аталған тапсырыстармен бірге 2035 жылға дейін біздің әуе флотымыз толықтай жаңа буын ұшақтардан құралады. Осылайша операциялық тиімділігіміз артып, жылдық орташа өсімді 6 пайыз деңгейіне жеткізу көзделуде», – делінді.
