Том Баррак: «Түрік Әуе жолдарының («THY») «Boeing» ұшақтарын сатып алуы аяқталды», - деді. Бұл мәлімдеме америкалық ұшақ өндіруші «Boeing» пен Түркияның ұлттық әуе тасымалдаушысы «THY» арасындағы маңызды келісімді растады.
Ақ Үйдің алдында келісімнің аяқталып-аяқталмағанын сұраған тілшілерге Баррак: «Келісім жасалды», – деп жауап берді, бірақ қосымша ақпарат бермеді.
Баррак бұл мәлімдемені Түркия президенті Режеп Тайып Ердоған мен АҚШ Президенті Дональд Трамптың кездесуінен кейін жасады.
Өткен апта Түрік Әуе жолдары «Boeing» компаниясымен ықтимал тапсырыс туралы келіссөздердің жалғасып жатқанын хабарлаған болатын. «THY»-дың Коммуникация жөніндегі төраға орынбасары Яхья Үстүн: «Бұл «Boeing»-пен біраз уақыттан бері талқыланып келе жатқан мәселе, бірақ әлі нақты шешім қабылданған жоқ», – деген болатын. Әзірге «Boeing» те, «THY» де Баррактың мәлімдемесіне ресми пікір білдірген жоқ.
Түрік Әуе Жолдарының кеңею стратегиясы
«THY» мен «Boeing» былтыр Түрік Әуе жолдарының жаһандық әуе жүк нарығындағы орнын күшейту үшін төрт «Boeing 777» жүк ұшағына тапсырыс беру жөнінде келісімге келген болатын. Бұл келісім «THY»-дың өсу стратегиясымен үйлесіп отыр. Стратегия аясында әуе компаниясы артқан бағыттар желісіне қызмет көрсету үшін әрі жүк, әрі жолаушы тасымалдау қуатын күшейтуді көздейді.
Сондай-ақ түрік әуе компаниясы «Pegasus» та өткен жылы 200 «Boeing» ұшағына тапсырыс беретінін мәлімдеген еді. Бұл жағдай Түркия нарығының америкалық ұшақ өндіруші «Boeing» үшін қаншалықты маңызды екенін көрсетеді.
«Boeing» еуропалық бәсекелесі «Airbus»-пен жарыса жаңа келісімшарт жасауға күш салуда. Стамбул әуежайының ірі халықаралық орталыққа айналуымен бірге Түркияның дамып келе жатқан авиация секторы екі компанияның басты назарында.
Том Баррактың ауызша растауы келісімнің аяқталғанын меңзесе де, тапсырыстың көлемі мен жеткізу кестесіне қатысты нақты ақпарат жоқ.
Сала сарапшыларының пікірінше, Түрік Әуе жолдарының «Boeing»-пен кез келген жаңа келісімі артып келе жатқан сұранысты өтеу үшін ұзақ қашықтыққа ұшатын жолаушы ұшақтарын және қосымша жүк ұшақтарын қамтуы мүмкін.
Президент Ердоған мен Трамптың кездесуі «Boeing» келіссөздеріне тікелей қатысты болмаса да, кең ауқымды экономикалық және қауіпсіздік тақырыптарын қамтыды. Алайда Баррактың мәлімдемесі бұл келісімнің АҚШ–Түркия қатынастары мен жаһандық авиация нарығы үшін маңызды екенін көрсетті .
