Еуропалық одақ (ЕО) Кеңесінің төрағасы Антониу Кошта Ресейдің Украинаға жасаған шабуылы кезінде Польшаның әуе кеңістігінің бұзылуына байланысты: «Бұл жағдай Ресейдің басқыншылық әрекеті тек Украинаға ғана емес, бүкіл Еуропаның қауіпсіздігіне қауіп төндіретінін тағы бір мәрте көрсетті», – деді.
Кошта “X” әлеуметтік желісіндегі парақшасында Ресейдің өткен түні Украинаға кең ауқымды шабуыл жасағанын мәлімдеді.
Кошта ЕО өз азаматтарын қорғау үшін тынымсыз еңбек етіп жатқан Украина мен Польша билігімен толық ынтымақта екенін айтып, Украинаның әуе қорғанысын күшейту мақсатында қолдауды арттырып жатқанын жеткізді.
Еуропалық комиссияның төрағасы Урсула фон дер Ляйен Украинаға 2022 жылғы ақпаннан бері жалғасып келе жатқан соғыста жеңіске жетуі үшін барлық қажетті қолдауды жалғастыратынын айтып, «Біз құрлықта, теңізде және әуеде Еуропаның қуатты қауіпсіздік архитектурасын қалыптастырып жатырмыз», – деді.
Бұған дейін Польша билігі Ресейдің Украинаның батысына жасаған жаппай зымырандық шабуылы кезінде елдің әуе кеңістігіне енген белгісіз нысанға тиесілі болуы мүмкін сынықтардың табылғанын хабарлаған болатын.
Польша Ішкі істер және әкімшілік министрлігі “X” желісінде жариялаған мәлімдемеде полиция қызметкерлері егістік алқаптан диаметрі шамамен 10 метр шұңқыр мен шығу тегі анықталмаған нысанның сынықтарын анықтағаны айтылды.
