Еуропалық одақ (ЕО) Украинаның шұғыл әскери қажеттіліктерін қамтамасыз ету мақсатында 3,47 миллиард еуро көлеміндегі қаржы бөлді.
Еуропалық комиссияның жазбаша мәлімдемесінде бұл төлем Украинаға арналған жалпы көлемі 90 миллиард еуроны құрайтын «Украинаны қолдау несиесі» бағдарламасының қорғаныс бағыты аясында жүзеге асырылғаны хабарланды.
Мәлімдемеде аталған қаражаттың Украинаның Ресейге қарсы өзін қорғау үшін қажет шұғыл әскери қажеттіліктерін өтеуге бағытталғаны айтылды. 3,47 миллиард еуро ұшқышсыз ұшу аппараттарын, алыс қашықтыққа ұшатын реактивті дрондарды, зымырандарды, әуе қорғанысы жүйелерін және “Gripen” жойғыш ұшақтарын сатып алуға жұмсалады.
Сондай-ақ мәлімдемеде 2022 жылдан бері жалғасып келе жатқан соғыс жағдайында Украинаға қажетті қорғаныс техникасын жедел жеткізу мақсатында дрондарға, оқ-дәрілерге, әуе қорғанысы жүйелеріне және зымырандарға арналған қосымша қаржыландырудың алдағы апталарда мақұлданатыны хабарланды.
ЕО-ның «Украинаны қолдау несиесі» бағдарламасы аясында Украинаның қорғаныс қабілеті мен қорғаныс өнеркәсібін нығайтуға 60 миллиард еуро, ал мемлекеттің қызметін және негізгі мемлекеттік қызметтерді үздіксіз қамтамасыз етуге 30 миллиард еуро көлемінде қолдау қарастырылған. Бағдарламаның жалпы қаржы көлемі — 90 миллиард еуро.
