Президент Ердоғанның кортежі Түркия мен Қазақстанның мемлекеттік туларымен безендірілген жолмен жүріп өтіп, Тәуелсіздік сарайына барды. Ердоғанды көліктен түскен кезде Қазақстан президенті Қасым-Жомарт Тоқаев қарсы алды.
Екі ел президенті салтанатты рәсім өтетін залға кіргеннен кейін әскери оркестр Түркия мен Қазақстанның мемлекеттік әнұрандарын орындады. Президент Ердоған сап түзеген құрмет қарауылының алдынан жүріп өтті.
Ресми делегациялар таныстырылғаннан кейін екі көшбасшы қол алысып, суретке түсті. Кейін президент Ердоған мен Тоқаев жеке кездесу өткізді.
Жеке кездесуден кейін Ердоған Түркия–Қазақстан Жоғары деңгейдегі стратегиялық ынтымақтастық кеңесінің алтыншы отырысына төрағалық етеді. Сондай-ақ екіжақты келісімдерге қол қою рәсіміне және бірлескен баспасөз мәслихатына қатысады.
Салтанатты рәсімге Түркия Сыртқы істер министрі Хакан Фидан, Ұлттық білім министрі Юсуф Текин, Ұлттық Қорғаныс министрі Яшар Гүлер, Өнеркәсіп және технология министрі Мехмет Фатих Каджыр, Сауда министрі Өмер Болат, Түркі Мемлекеттері Ұйымы Ақсақалдар кеңесінің төрағасы Бинали Йылдырым, Түркия Президент аппараты жанындағы Коммуникация басқармасының басшысы Бурханеттин Дуран, Түркия Президент Әкімшілігінің Қорғаныс өнеркәсібі басқармасының төрағасы Халюк Гөргүн, Түркия Президентінің сыртқы саясат және қауіпсіздік мәселелері жөніндегі бас кеңесшісі Акиф Чагатай Кылыч және Әділет және даму партиясы төрағасының орынбасарлары да қатысты.
