АҚШ президенті Дональд Трамп Түркия президенті Режеп Тайып Ердоғанның Ресей мен Украина арасындағы соғысты тоқтатуда маңызды рөл атқара алатынын айтты.
Дүйсенбі күні Трамп Мысырдан Ақ Үйге қайтар жолда «Air Force One» ұшағында журналистердің сұрақтарына жауап берді. «Мемлекет басшыларының әсіресе Ердоғанның Ресей-Украина соғысын тоқтатуға көмектесуі мүмкін бе?» деген сауалға: «Ердоған көмектесе алады», - деп жауап берді. Ол сонымен қатар «Оған Ресей құрметпен қарайды», - деп қосты.
Түркия 2022 жылдың ақпан айында басталған Ресей-Украина соғысын тоқтату бағытындағы күш-жігерін жалғастырып келеді. Анкара Киев пен Мәскеуді келіссөздер арқылы қақтығысты тоқтатуға шақырып, бейбітшіліктің негізін қалау үшін араағайындықпен бірге барлық бастамаларға дайын екенін мәлімдеді.
Зеленскиймен кездесу
Украина мәселесіне қатысты ұшақта қойылған сұрақтарға жауап берген АҚШ президенті Дональд Трамп жұма күні Ақ Үйде Украина президенті Владимир Зеленскиймен кездесу өткізетінін растады.
Таңертең Зеленский Украина делегациясының бірқатар кездесуге қатысу үшін АҚШ-қа жолға шыққанын және жұма күні Трамппен кездесетінін мәлімдеген еді. Зеленский «X» платформасындағы жазбасында: «Жұма күні Вашингтонға барып, президент Трамппен кездесемін. Бірқатар мәселені талқылаймыз деп ойлаймын. Диалогымыз бен қолдауы үшін президент Трампқа ризашылығымды білдіремін», - деп жазды.
Зеленский сондай-ақ сапардың негізгі назарында әуе қорғанысы мен ұзақ қашықтықтағы мүмкіндіктердің болатынын айтып, бұл мәселелердің Ресейге бейбітшілік үшін қысым жасау мақсатында талқыланатынын атап өтті.
