Украина, Ресей және АҚШ өкілдері Абу-Дабиде кездеседі
Киев, Мәскеу және Вашингтоннан келген келіссөз жүргізушілер Ресей–Украина соғысын тоқтату мақсатындағы екі күнге созылатын кездесу үшін Абу-Дабиде жиналмақ.
Украина, Ресей және АҚШ өкілдері төрт жылға жуыққа созылған соғыстың қалай аяқталатынына қатысты күрделі келіссөзді ілгерілету үшін сәрсенбі күні Абу-Дабиде кездеседі.
Тараптар арасында бұған дейін өткен бірнеше дипломатиялық раундта 2022 жылғы ақпанда басталған, Екінші дүниежүзілік соғыстан бері Еуропадағы ең қанды қақтығыс саналатын бұл соғысты тоқтатуға бағытталған келісімге қол жеткізілген жоқ.
Келіссөздерге дайындық кезеңінде Ресейдің дронд және зымыран арқылы жасаған шабуылдары Украинадағы энергетикалық инфрақұрылымды нысанаға алып, қатты суықта электр мен жылу жүйелерін істен шығарды.
Украина президенті Владимир Зеленский сейсенбі күні:
«Ресейдің әрбір шабуылы Мәскеудің ұстанымы өзгермегенін дәлелдейді: олар соғысқа және Украинаны жоюға инвестиция салуды жалғастырып отыр, ал дипломатияға байыппен қарамайды. Біздің келіссөз тобының жұмысы осыған сәйкес бейімделеді», – деді.
Негізгі тығырық – Украинаның шығысындағы аумақтардың ұзақ мерзімді тағдыры.
Мәскеу кез келген келісімнің алғышарты ретінде Киевтен табиғи ресурстарға бай, қатты бекініс жасалған қалаларды қамтитын Донбасс аймағының кең бөліктерінен әскерін әкетуді талап етеді. Сонымен қатар соғыс барысында басып алынған аумақтардың Ресейге тиесілі екенін халықаралық деңгейде мойындатуды қалайды.
«Ең жаманына дайын болыңдар»
Украина делегациясына Қауіпсіздік кеңесінің төрағасы Рустем Умеров жетекшілік етеді.
Ресейдің бас келіссөз жүргізушісі – әскери барлау басшысы Игорь Костюков.
Өткен айда Абу-Дабиде өткен алдыңғы келіссөз раундында АҚШ делегациясын Стив Уиткофф басқарған.
Украина аумағының шамамен 20 пайызын басып алған Ресей келіссөздер сәтсіз аяқталған жағдайда Донецк облысының қалған бөлігін де басып алатынын ескертті.
Украина аумақтан айырылу Мәскеуді одан әрі батылдандыратынын айтып, Ресейге болашақта жаңа басқыншылық жасауға мүмкіндік беретін ешбір келісімге қол қоймайтынын мәлімдеді.
Қазіргі уақытта Киев Донецк облысының шамамен бестен бір бөлігін бақылауында ұстап отыр.
“AFP” агенттігінің талдауына сәйкес, Ресейдің қазіргі ілгерілеу қарқынымен есептегенде Мәскеу армиясына бүкіл өңірді толық басып алу үшін тағы шамамен 18 ай қажет болуы мүмкін. Алайда Украина бақылауындағы аумақтарда қатты бекініс жасалған ірі қалалар бар.
Ресей сондай-ақ Луганск, Херсон және Запорожье облыстарын өзіне тиесілі деп санайды және Украинаның шығысындағы кемінде тағы үш облыста майдан тәрізді аумақтарды бақылауда ұстап отыр.
Қоғамдық пікір сауалнамаларына қарағанда Украина халқының басым бөлігі Мәскеуге жер беріп, оның орнына бейбітшілік орнатуды көздейтін келісімге қарсы.