«Brent» шикі мұнай биржадан тыс нарықта 10 пайызға күрт өсіп, барреліне шамамен 80 долларға жетті»,- деп хабарлады мұнай трейдерлері. АҚШ пен Израильдің Иранға жасаған шабуылдарынан кейін Таяу Шығыста соғыс қаупі күшейіп, сарапшылар мұнай бағасы 100 долларға дейін көтерілуі мүмкін екенін болжады.
«ICIS» компаниясының энергетика және мұнай өңдеу жөніндегі директоры Аджай Пармар: «Әскери шабуылдар мұнай бағасының өсуіне әсер етеді, бірақ бұл жерде шешуші фактор ˗ Хормуз бұғазының жабылуы», - деді.
Сауда дереккөздерінің айтуынша, Тегеран кемелерге бұл су жолымен өтпеу туралы ескерту жасағаннан кейін көптеген танкер иелері, энергетикалық компаниялар және сауда ұйымдары Хормуз бұғазы арқылы мұнай, жанармай және сұйытылған газ тасымалын уақытша тоқтатты.
Әлемдік мұнай саудасының 20 %-дан астамы Хормуз бұғазы арқылы өтеді.
Пармар: «Нарық ашылғанда баға 100 доллардан басталуы мүмкін, ал бұғаз ұзақ уақытқа жабылса, бұл деңгейден де асып кетуі ықтимал», - деді.
«OPEC+» өндірісті арттырмақ
«RBC» сарапшысы Хелима Крофт Таяу Шығыс елдерінің басшылары Вашингтонға Иранмен соғыс болған жағдайда мұнай бағасы барреліне 100 доллардан асып кетуі мүмкін екенін ескерткенін айтты. «Barclays» сарапшылары да баға 100 долларға жетуі ықтимал екенін мәлімдеді.
Мұнай өндіруші елдерден тұратын «OPEC+» тобы жексенбі күні сәуір айынан бастап өндірісті тәулігіне 206 мың баррельге арттыру туралы шешім қабылдады. Бұл өсім әлемдік сұраныстың 0,2 пайызынан аз бөлігін құрайды.
«Rystad Energy» экономисі Хорхе Леонның айтуынша, Хормуз бұғазы жабылған жағдайда балама инфрақұрылым пайдаланылғанның өзінде тәулігіне 8-10 миллион баррель шикі мұнай жеткізілімі жоғалуы мүмкін. Оның сөзінше, Сауд Арабиясының Шығыс-Батыс құбыры мен Абу-Даби құбыры арқылы белгілі бір көлемде бағыттауға болады, бірақ бұл шығынды толық өтей алмайды.
«Rystad» болжамынша, нарық ашылған кезде баға шамамен 20 долларға өсіп, барреліне 92 доллар деңгейіне көтерілуі мүмкін.
Иран дағдарысы Азиядағы үкіметтер мен мұнай өңдеу зауыттарын мұнай қорларын көбейтіп, жеткізудің балама бағыттарын қарастыруға итермеледі.
