Рубио АҚШ президенті Дональд Трамптың шілде айында Анкарада өтетін НАТО саммитіне қатысатынын хабарлады.
Өкілдер палатасының Сыртқы істер комитетінде сөйлеген сөзінде Рубио Анкарадағы саммиттің одақ тарихындағы ең маңызды жиын болатынын атап өтті.
«Нақтылауды және түзетуді қажет ететін бірқатар мәселе бар. Америка Құрама Штаттары әлі де НАТО одағының мүшесі және біз саммитке қатысамыз», – деді ол.
Рубио АҚШ-тың НАТО құрамындағы мүшелігі жалғасатынын айтып, одаққа елеулі өзгерістер қажет екенін жеткізді. Оның айтуынша, бұл мәселелер 7–8 шілде күндері Түркия астанасы Анкарада өтетін саммитте талқыланбақ.
Хакан Фидан Трамптың саммитке қатысуы мүмкін екенін меңзеген еді
Түркия Сыртқы істер министрі Хакан Фидан бұған дейін жасаған мәлімдемесінде Дональд Трамптың НАТО саммитіне қатысуды жоспарлап отырғанын меңзеген болатын.
Фиданның айтуынша, Түркия президенті Режеп Тайып Ердоған өткен айда Трамппен бірнеше рет телефон арқылы сөйлескен. АҚШ президенті телефон әңгімесі барысында саммитке қатысуға ниет білдірген.
Фидан саяси мәлімдемелерге қарамастан, АҚШ-тың одаққа адалдығы сақталып отырғанын атап өтті. Ол Вашингтонның НАТО-дан шығуы мүмкін деген болжамдарды растайтын нақты белгілер жоқ екенін айтты.
«АҚШ одақтастарына қорғаныс шығындарын арттырып, қауіпсіздік үшін көбірек жауапкершілік алуға үндеп келеді. Еуропалықтар бұл үндеуді қабылдап, НАТО аясында қорғаныс бюджеттерін ұлғайту бағытында қадам басты. Көшбасшылар бас қосқанда қол жеткізілген ілгерілеуді бағамдайтын боламыз», – деді Фидан.
