Белоусов дүйсенбі күні жасаған мәлімдемесінде Ресей қараша айына дейін ұшқышсыз ұшу аппараттарының шабуылына қарсы әуе қорғаныс жүйесіне жасанды интеллект негізіндегі шешім қабылдау тетігін енгізуді жоспарлап отырғанын айтты.
Мәскеуде әскери тілшілермен өткен кездесуде сөйлеген министр бұл жоба жыл соңына дейін жүзеге асырылуы тиіс жеті қорғаныс бастамасының бірі екенін және оның азаматтық компаниялармен бірлесіп әзірленіп жатқанын жеткізді.
«Әуе қорғанысы саласында бұл бағытта белсенді жұмыс жүргізіп жатырмыз. Бұл – жыл соңына дейін іске асырылуы тиіс жеті жобаның бірі. Алғашқы нәтижелер қараша айына дейін көрінеді деп күтілуде», – деді Белоусов.
Оның айтуынша, Ресей сәуір айынан бері дрон шабуылдарына қатысты жағдайды жедел бақылауға арналған біріктірілген ақпараттық жүйе құрып келеді. Сонымен қатар командирлерге нысаналарды анықтауға, ұрыс алаңын бақылауға және әскери операцияларды басқаруға мүмкіндік беретін бағдарламалық қамтамасыз ету тактикалық деңгейден бастап кезең-кезеңімен енгізілуде.
Белоусов сондай-ақ Ресейдің Украинадағы әскери операцияларға қатысатын барлық бөлімшесінде ұшқышсыз ұшу аппараттарына қарсы көпқабатты қорғаныс жүйесі құрылғанын және дрондарға қарсы мобильді атыс топтары белсенді түрде орналастырылып жатқанын айтты.
