АҚШ президенті Дональд Трамп жексенбі күні «Truth Social» әлеуметтік желісіндегі парақшасында: «Келісімге қол жеткізіліп, қол қойылғанға дейін қоршау жалғасады. Екі тарап та уақытты тиімді пайдаланып, дұрыс жұмыс істеуі тиіс. Қателікке жол жоқ!», - деп жазды.
Трамп сондай-ақ АҚШ пен Иран арасындағы қарым-қатынастың кәсіби әрі тиімді түрде жүріп жатқанына тоқталып, Тегеранның ядролық қару әзірлемеуі керектігін атап өтті.
Трамп Таяу Шығыс елдеріне қолдау мен ынтымақтастық үшін алғыс білдіріп, «Abraham» келісімін мақұлдайтындар қатарын кеңейту арқылы ықпалдастықты күшейтетінін айтты. Сондай-ақ Иранның да бір күні осы бастамаға қосылуы мүмкін екенін жеткізді.
Трамп 2015 жылғы Иранның ядролық бағдарламасына қатысты келісімді «тарихтағы ең нашар келісімдердің бірі» деп бағалап, Барак Обама әкімшілігін айыптады.
«Тиімді әрі орынды келісім»
Трамп Иранмен келіссөздердің жақсы жүріп жатқанына тоқталып, «Бұл үдеріс Тегеранның ядролық қаруға қол жеткізуіне жол бермейді»,- деп мәлімдеді.
АҚШ президенті жексенбі күні «Truth Social» платформасындағы жазбасында Иранмен ықтимал келісімнің бұрынғы президент Барак Обама кезеңінде жасалған 2015 жылғы келісімге қарағанда «тиімді әрі орынды келісім» болатынын жазды. Оның айтуынша, Обама кезінде жасалған келісім Тегеранға ауқымды көлемде қаржы мен ядролық қаруға мүмкіндік берген. Ол қазіргі келіссөздің мүлде басқаша жүріп жатқанына тоқталып, келісімге әлі толық қол жеткізілмегенін атап өтті.
Трамп келіссөздерді сынаушылардың келісім жөнінде ешнәрсе білмейтінін айтып, бұрынғы әкімшілік секілді «тиімсіз келісім» жасамағанын жеткізді.
Ал Иран бұқаралық ақпарат құралдары жексенбі күні Иран мен АҚШ арасындағы ықтимал келісімнің кейбір тармақтары бойынша әлі де келіспеушілік бар екенін хабарлады.
«Tasnim» ақпарат агенттігінің мәліметінше, АҚШ бүгін өткен келіссөзге қарамастан, Иранның бұғатталған активтерін босату мәселесімен қатар келісімнің бірқатар тармағына қатысты ұстанымын өзгертпеген.
