Газа Денсаулық сақтау министрлігі сәрсенбі күні жасаған мәлімдемесінде 54 мәйіт пен 66 жәшікке салынған адам қалдықтарының Қызыл Крест көліктерімен Әш-Шифа медициналық кешеніне жеткізілгенін білдірді.
Медицина қызметкерлері бекітілген медициналық рәсімдерге сәйкес дереу сот-медициналық сараптама жұмыстарын бастады.
Министрлік тексеру және құжаттау үдерістерінің тиісті мекемелер мен мамандандырылған комитеттермен үйлестіру аясында жалғасып жатқанын хабарлады.
Бұл жұмыс аяқталғаннан кейін белгіленген хаттамаға сәйкес отбасыларға мәйіттерді сәйкестендіруге рұқсат беріледі.
Қаңтар айында АҚШ жариялаған атысты тоқтату келісімі Израильдің Газадан әскерін әкетуін және өңірде қайта қалпына келтіру жұмыстарын бастауды көздеген.
Медициналық дереккөздердің хабарлауынша, сәрсенбі күні таңертең Израильдің Газада жалғасып жатқан шабуылдары салдарынан әйелдер мен балаларды қоса алғанда 21 палестиналық қаза тауып, көптеген адам жарақат алған.
Палестина Қызыл Жарты Ай қоғамының мәліметінше, Газаның оңтүстігіндегі Хан Юнус қаласының Әл-Мәуаси ауданына жасалған бомбалау кезінде бір медицина қызметкерін қоса алғанда екі адам қаза тауып, 12 адам жараланған.
Жараланғандар Қызыл Жарты Айдың Әл-Мәуасидегі далалық ауруханасына жеткізілді.
БҰҰ- ның бағалауынша, аймақты қайта қалпына келтіруге шамамен 70 миллиард АҚШ доллары қажет.
