Украина президенті Владимир Зеленский соғысты тоқтатуға бағытталған келіссөзді жеделдету және тұтқын алмасуын қайта бастауға арналған күш-жігерді ілгерілету мақсатымен Түркияға келуді жоспарлап отырғанын айтты.
Зеленский сейсенбі күні “Telegram”-да жариялаған мәлімдемесінде сәрсенбі күні «бірқатар кездесу» өткізетінін, бірақ Түркияның қай қаласына баратынын немесе кімдермен кездесетінін атап көрсетпеді.
Ол: «Ертең Түркияда келіссөз өтеді. Келіcсөздерді күшейтуге дайындалып жатырмыз және серіктестерімізге ұсынатын шешімдерді әзірледік. Соғысты аяқтау — Украина үшін басты мақсат. Сондай-ақ тұтқын алмасуын және соғыс тұтқындарының оралуын қайта бастау үшін жұмыс істеп жатырмыз», -деді.
Бұдан бөлек АҚШ медиасы АҚШ-тың арнайы өкілі Стивен Уиткоффтың сәрсенбі күні Зеленскиймен өтетін кездесуге қатысу үшін Түркияға баруы күтіліп отырғанын жазды.
Кремль: “Ресей бұл аптадағы келіссөзге қатыспайды”
Сонымен қатар Кремль сейсенбі күні Ресейдің осы аптада Түркияда өтетін кездесулерге қатыспайтынын мәлімдеді.
Кремльдің баспасөз хатшысы Дмитрий Песков журналистерге: «Жоқ, ертең Түркияда ешбір ресейлік өкіл болмайды. Бұл кездесулер әзірге Ресейдің қатысуынсыз өтуде», - деді.
Песков президент Владимир Путиннің кездесу нәтижелері туралы Түркия немесе АҚШ арқылы ақпарат алуға ашық екенін де айтты.
