«7News»-тің хабарлауынша, Австралияның Сидней қаласының батысында үстінде Палестина туы мен «Палестинаға бостандық» деген жазуы бар жүк көлігі өртенді. Көлік иелері «бұл шабуыл саяси әрекет» деді.
Қауіпсіздік камераларынан бір күдіктінің көліктің айналасында жүргені, кейін оның астына молотов коктейлін тастағаны анық көрінді. Көлік отқа оранғанда, өртеуші жаяу қашып кеткен.
Екі жылдан астам уақыт бойы «Газаға бостандық», «Палестинаға бостандық» деген ұрандар жазылған бұл көлік онлайн платформаларда талқылауларға себеп болды. Көлік иелеріне бірнеше рет қоқан-лоққы жасалған. Олар соңғы ескертуді жексенбі күні алғандарын, бірақ бұл жолы көліктің алғаш рет зақымдағанын айтты.
Көлік иелерінің бірі: «Бұл бейбіт түрде наразылық білдіріп, сөз бостандығын бейбіт жолмен қолданып жүргендерге қарсы өшпенділікке негізделген шабуыл», – деді.
Полиция әзірге шабуылдың саяси мақсатпен жасалып-жасалмағанын растаған жоқ, тергеу жалғасуда.
21 қыркүйек күні Австралия премьер-министрі Энтони Албанезе «X» платформасында жариялаған мәлімдемесінде елдің тәуелсіз әрі егемен Палестина мемлекетін ресми түрде мойындағанын хабарлаған болатын.
Сондай-ақ Австралияның исламофобияға қарсы арнайы өкілі болып тағайындалған Афтаб Малик 13 қыркүйек күні жасаған мәлімдемесінде: «Австралияда исламофобия үнемі мәселе туындатты. Кейде еленбей, кейде жоққа шығарылды, бірақ ешқашан толық шешімін тапқан жоқ», – деген болатын.
Австралиядағы еврей кеңесі де бейсенбі күні «X»-тегі жазбасында Премьер-министр кеңсесіне 80 беттен тұратын құжат пен 2 700-ден астам қол қойылған петицияны тапсырғанын, Израильге санкция салып, Газадағы геноцидті тоқтатуды талап еткенін мәлімдеді. Кеңес дүйсенбі күнгі мәлімдемесінде үкіметті Израиль шенеуніктеріне санкция салуға, қару-жарақ саудасын тоқтатуға және Тель-Авивті халықаралық құқықты өрескел бұзғаны үшін жауапқа тартуға шақырды.
