Иранның Сыртқы істер министрі Аббас Аракчи бұл жағдайды «өте ауыр тәжірибе» деп атап, АҚШ-пен қайта келіссөз жүргізу мүмкіндігін жоққа шығарды.
Дүйсенбі күні «PBS News» арнасына берген сұхбатында Аракчи Иранның жаңа рухани көсемі Моджтаба Хаменейдің келіссөздерді қайта бастау немесе бітімге келу туралы сұраққа жауап берді. Ол: «Бұл мәселе жөнінде пікір айтуға әлі ерте». - деді
Сонымен қатар Аракчи: «Америкалықтармен қайта келіссөз жүргізу мәселесі күн тәртібінде болады деп ойламаймын, өйткені америкалықтармен келіссөз жүргізу тұрғысынан өте ауыр тәжірибеміз бар», - деді.
Ол Тегеран мен Вашингтон арасында келіссөз жүріп жатқан кезде болған 12 күндік соғысқа тоқталып, сол кезеңде Израиль мен АҚШ күштері Иранның ядролық нысандарына шабуылдағанын айтты.
Министр ақпан айының соңында Женевада өткен АҚШ-Иран ядролық келіссөздерінің соңғы кезеңіне де тоқталып, екі тараптың да Оманның араағайындығымен өткен келіссөздерді нәтижелі деп бағалағанын атап өтті.
Алайда ол: «Үш келіссөз өткеннен кейін, тіпті америкалық делегацияның өзі үлкен ілгерілеу болғанын айтқанына қарамастан, олар бәрібір бізге шабуыл жасау туралы шешім қабылдады», - деді.
Сондықтан америкалықтармен қайта келіссөз жүргізу қазір Иранның күн тәртібінде жоқ.
Аймақтық шиеленістер
Жаһандық мұнай нарығындағы іркілістерге тоқталған Аракчи Иран мұнай өндірісі мен тасымалындағы кедергілерге жауапты емес екенін айтты. «Бұл біздің кінәміз емес. Бұл біздің жоспарымыз да емес», - деді ол.
Оның айтуынша, мұндай кедергілер Израиль мен Америка Құрама Штаттары жасаған шабуыл салдарынан туындаған.
Аракчидің пікірінше, бұл шабуылдар аймақты тұрақсыз әрі қауіпті жағдайға айналдырып отыр. «Сондықтан танкерлер мен кемелер Ормуз бұғазы арқылы өтуге қорқады», – деді ол.
Министр сондай-ақ «аймақтағы энергетикалық инфрақұрылымға жасалған шабуылдар арқылы мұнай жеткізілімін әдейі шектеп отыр» деген айыптауларды да жоққа шығарды. «Бізге заңсыз шабуыл жасалды, ал біздің әрекетіміз – заңды және өзін-өзі қорғау», - деді ол.
Сонымен қатар ол аймақ елдеріне ескерту жасап, егер АҚШ Иранға тікелей шабуыл жасаса, Иран Американың аймақтағы әскери базаларын нысанаға алатынын айтты. «Мұның салдарынан соғыс бүкіл аймаққа таралуы мүмкін», - деді ол. «Бұл жағдайға біз жауапты емеспіз».
