Иранның бұқаралық ақпарат құралдарының хабарлауынша, Иранның Сарапшылар мәжілісі Моджтаба Хаменейді әкесі Әли Хаменейдің орнына елдің жаңа рухани көсемі етіп тағайындады.
Моджтаба Хаменей Ислам революциясы сақшылары корпусымен тығыз байланысы бар және орта деңгейдегі діни қайраткер ретінде белгілі. Ол ұзақ уақыт бойы Иран билігінің кейбір топтары тарапынан АҚШ пен Израильдің Иранға жасаған шабуылдары кезінде қаза тапқан әкесі Әли Хаменейдің мұрагері ретінде белгілі болған.
Иранның билік идеологиясы мұрагерлік жолмен биліктің берілуіне қарсы болғанымен, Моджтаба Хаменейдің Ислам революциясы сақшылары корпусы ішінде мықты қолдаушылары бар.
Сарапшылар мәжілісі жасаған мәлімдемеде 56 жастағы Моджтаба Хаменейдің Сарапшылар мәжілісінің құрметті өкілдерінің дауыс беруі арқылы Иран Ислам Республикасының қасиетті жүйесінің рухани көсемі болып тағайындалғаны айтылды.
Мәлімдемеде дінбасылар кеңесі қылмыскер Америка мен зұлым сионистік режимнің қатыгез агрессиясына қарамастан жаңа көшбасшыны таңдауда кідіріс жасамағаны атап өтілді.
Қарсылық
Бұл шешім АҚШ президенті Дональд Трамптың бұған дейін Моджтаба Хаменейді «маңызы жоқ тұлға» деп атап, Иранды кім басқаратынына өзі де ықпал етуі керек екенін айтқанынан кейін қабылданды.
Трамп ресми ақпарат жарияланбай тұрып «ABC News» арнасына берген сұхбатында «Біз мақұлдамасақ, ол ұзақ уақыт билікте қала алмайды», – деген еді.
Иран Ұлттық қауіпсіздік кеңесінің хатшысы Әли Лариджани Моджтаба Хаменейдің елді қазіргі күрделі жағдайда басқара алатынын айтып, жаңа рухани көсемнің төңірегіне бірігуге шақырды.
Иран Ислам революциясы сақшылары корпусы да жаңа көсемді қолдауға және оған бағынуға дайын екенін мәлімдеді.
