Президент аппараты жанындағы Коммуникация басқармасының төрағасы Бурханеттин Дуран дүйсенбі күні жасаған мәлімдемесінде Тель-Авив әкімшілігінің оккупацияланған Батыс Шериядағы кейбір аймақтарды Израильдің «мемлекеттік меншігіне» айналдыру туралы шешімін қатаң сынға алды.
Ол мұндай әрекеттер аймақтағы әділетсіздікті тереңдетіп, бейбітшілікке, өңірлік тұрақтылық пен қауіпсіздікке деген үміттерді әдейі нысанаға алатынын айтты. Дуран: «Палестина халқының тарихи және заңды құқықтарын елемейтін әрі демографиялық және құқықтық құрылымды өзгертуді көздейтін бұл тәсіл аймақта түбегейлі тұрақтылық орнатудың алдындағы ең үлкен кедергілердің бірі болады», — деді.
Дуран мәлімдемесін Түркияның “Nsosyal” әлеуметтік желі платформасы арқылы жасады.
Бұл мәлімдеме Израиль үкіметі бір күн бұрын Батыс Шериядағы палестиналық жерлерді «мемлекеттік меншік» ретінде тіркеуге қатысты ұсынысты мақұлдағаннан кейін жасалды.
Израильдің қоғамдық телерадиокорпорациясы бұл ұсынысты Қаржы министрі Бецалель Смотрич, Әділет министрі Ярив Левин және Қорғаныс министрі Исраэль Кац ұсынғанын хабарлады.
Палестиналықтар бұл қадамдарды Батыс Шерияның ресми аннексиясына апаратын үдерістің бастамасы және аймақты іс жүзінде аннексиялауға бағытталған әрекет ретінде қарастыруда.
