Бельгияның Қорғаныс министрі Тео Франкен Ресейге қатаң ескерту жасап, Брюссельге бағытталған кез келген зымыран шабуылы НАТО-ның қарсы әрекетін туғызатынын айтты.
Франкен дүйсенбі күні «De Morgen» газетіне берген сұхбатында: «Егер (Ресей президенті Владимир) Путин Брюссельге зымыранмен шабуылдайтын болса, біз Мәскеуді картадан жоямыз», – деп мәлімдеп, НАТО-ның ұжымдық қорғаныс міндеттемесін атап өтті.
Ол сондай-ақ АҚШ-тың, әсіресе президент Дональд Трамп әкімшілігі кезінде НАТО-ға адалдығына күмән келтірген пікірлерді сынға алып, «Еуропада АҚШ үкіметіне қарсы қате көзқарас қалыптасқан. Бұл сенгісіз жағдай. Трамп Америка Құрама Штаттарының НАТО одақтастарын жүз пайыз қолдауды жалғастыратынын анық айтты. Брюссельге бір қанатты зымыран ба? Бұл қандай анықтаманы қолдансаңыз да, айқын агрессия болар еді. Путин де бұған бармайды», – деді.
Сонымен қатар Франкен Ресейдің әскери әлеуетін төмен бағаламауға шақырып, «Ресей өз әскери қуатын арттырды. Олардың соғыс экономикасы бүкіл НАТО елдерінің жалпы өндірісінен төрт есе көп оқ-дәрі шығарады. Еуропаның біріккен орталық қолбасшылығы да жоқ», – деп ескертті.
Ресейдің Украинадағы соғысына тоқталып, «Себебі олар бүкіл Батысқа қарсы соғысып жатыр. Украиналықтар біздің қаруымызбен, оқ-дәрімізбен және қаржымызбен шайқасуда. Әйтпесе әлдеқашан талқандалар еді», – деді.
Қытай соғыстың жалғасқанын қалайды
Франкен алдағы кезеңге көз жүгірте отырып, Қытай мен Ресейдің батысқа қарсы ықтимал қарсыласу қаупін де атап өтіп, «Қытай Украинадағы соғыстың ұзаққа созылғанын қалайды, себебі бұл батысты әлсіретеді. Олар Ресейдің шикізатын жаппай сатып алып, қару жеткізіп отыр және Путиннің Солтүстік Корея сарбаздарын орналастыруына разы», – деді.
Соңында Бельгия Қорғаныс министрі Балтық елдеріне ірі ресейлік шабуылдың ықтималдығы төмен екенін айтып, «Себебі олар НАТО мүшелері. Жақында Еуропада 600 «F-35» ұшағымыз болады. Ресей олардан қорқады», – деп түйіндеді.
