Франция Президенті Эммануэль Макрон Израильдің үздіксіз соғыс жағдайында көршілес елдердің қауіпсіздігі мен  тұрақтылығын қамтамасыз ете алмайтынын мәлімдеді. Нью-Йоркте өткен БҰҰ Бас Ассамблеясында сөйлеген сөзінде Макрон Таяу Шығыстағы бейбітшіліктің маңыздылығына тоқталып, Палестина, Ливан және өзге де елдермен болған қақтығыстардың тұрақсыздықты күшейтіп отырғанын атап өтті.

Ол: «Көршілерімен үздіксіз соғыс жағдайындағы Израиль үшін қауіпсіздік те, тұрақтылық та мүмкін емес», – деді.

Макрон сейсенбі күні Газадағы қырғынды тоқтату және екі мемлекет негізіндегі шешімді қорғау үшін жоспар қабылданғанын жеткізді.
Франция және Сауд Арабиясының бастамасымен бейбітшілікті ілгерілету мақсатында дайындалған «Нью-Йорк декларациясына» БҰҰ-ның 142 мүшесі қол қойғанын қуанышпен атап өтті.

Аймақтық қауіпсіздік

Макрон Сирияға қатысты мәлімдемесінде Асад режимі құлағаннан кейін елдің бірлігі мен егемендігін қайта қалпына келтіруі қажет екенін айтты. Сондай-ақ ол Францияның Сирияның азаматтық қоғамының барлық құрамдас бөлігіне құрметпен қарайтын саяси өтпелі кезеңді қолдайтынын жеткізіп, тұрақтылықты қайта орнатудың және ел егемендігін қайтарудың жалғыз жолы инклюзивті басқару екенін атап өтті.

Иранның ядролық бағдарламасы толық бақылауға алынбаған жағдайда аймақтық тұрақтылыққа қауіп төнетінін ескертті.