Біріккен Ұлттар Ұйымының палестиналық босқындарға көмек көрсету агенттігі бейсенбі күні жасаған мәлімдемесінде Газада 650 мыңнан астам баланың қатарынан үш жыл бойы мектептен тыс қалып отырғанын хабарлады.
Агенттік «X» платформасында жариялаған жазбасында: «Газадағы балалар үш жыл қатарынан мектепке бара алмай отыр. Шамамен 660 мың ер бала мен қыз бала үшін мектепке оралу - тек оқу үдерісі ғана емес, сонымен бірге терең психологиялық жарақаттың жақсаруын білдіреді», - деп атап өтті.
Агенттік Газадағы ең ірі гуманитарлық ұйым ретінде бұл балаларға қолдау көрсетуге дайын екенін де мәлімдеді.
Агенттіктің сыртқы байланыстар жөніндегі директоры Тамара Альрифаи: «Агенттік үшін басты басымдық - балалардың мектепке қайта оралуы мен оқуын жалғастыруы»,-деді. Израильдің 2023 жылдың қазан айынан бері жалғастырып келе жатқан шабуылдары нәтижесінде 68 мың палестиналық қаза тапты. Олардың көпшілігі әйелдер мен балалар. Газа аймағы өмір сүруге жарамсыз жағдайда.
БҰҰ Гуманитарлық істерді үйлестіру басқармасының дерегінше, шабуылдар Газадағы мектеп ғимараттарының 97 пайызын толықтай немесе жартылай жойған.
Өткен апта Израиль мен Хамас АҚШ президенті Дональд Трамп ұсынған жоспар негізінде бітім келісіміне қол жеткізді.
Жоспардың бірінші кезеңі тұтқын алмасуды қамтиды. Сонымен қатар жоспар Газа қаласын қайта қалпына келтіруді және ХАМАС-сыз жаңа басқару құрылымын қалыптастыруды көздейді.
