Түркия Газаға гуманитарлық көмек жеткізуге ұмтылған флотилияға Израиль армиясы жасаған шабуылды «қарақшылық және халықаралық құқықты өрескел бұзу» деп атады.
Түркия Сыртқы істер министрлігі сәрсенбі күні жасаған мәлімдемесінде құрамында түрік азаматтары мен депутаттары бар «Бостандық» флотилиясына жасалған бұл шабуыл геноцид саясатын жүргізіп отырған Израиль үкіметінің барлық бейбіт бастамаларға қарсы екенін, шиеленісті күшейтіп, бейбітшілік орнату талпыныстарына нұқсан келтіргенін атап өтті.
Анкара түрік азаматтарын босату үшін барлық қажетті шараның қабылданып жатқанын мәлімдеді. Министрлік сондай-ақ өзге елдердің азаматтарына қатысты да үйлестіру жұмыстары жүргізіліп жатқанын хабарлады.
Израиль азық-түлік пен дәрі-дәрмек секілді гуманитарлық көмектің Газаға жеткізілуіне тосқауыл қойып, әлемдегі адам құқықтарын қорғау ұйымдары мен үкіметтер «ашаршылық» деп атаған ауыр жағдайдың туындауына себеп болды.
Флотилия Израильдің Газаға бағытталған заңсыз қоршауын бұзуға тырысуда және Тель-Авивтің геноцид саясатына қарсы жүкті Израиль порттарына түсіруден бас тартып отыр.
