Ресей тағайындаған Қырым басшысы Сергей Аксёнов «Telegram» желісінде жариялаған мәлімдемесінде: «Алдын ала мәлімет бойынша, Симферопольдегі ғимараттарға жасалған шабуылда үш адам қаза тауып, жеті адам жараланды», – деді. Ол шабуыл туралы қосымша ақпарат бермеді.
Украина президенті сәрсенбі күні Украина күштері Санкт-Петербургте маңызды экономикалық форум өтіп жатқан кезде Ресейдің бірқатар стратегиялық нысанына, соның ішінде Санкт-Петербург мұнай терминалына соққы жасағанын мәлімдеді.
Зеленский «X» әлеуметтік желісіндегі жазбасында бұл нысанның Украина шекарасынан шамамен 1100 шақырым қашықтықта орналасқанын айтып, Киевтің алыс қашықтықтағы соққы беру мүмкіндігіне назар аударды.
Оның сөзінше, украиналық күштер Ресейдің Кронштадттағы әскери нысандарына да соққы жасаған.
Зеленский тағы бір нысан ретінде майдан шебінен шамамен 600 шақырым қашықтықтағы Ресейдің Тамбов облысында орналасқан қару-жарақ өндірісі зауытын атады.
Санкт-Петербург губернаторы Александр Беглов «Telegram»-дағы мәлімдемесінде таңертең Кронштадт, Киров және Красносельск аудандарындағы инфрақұрылым нысандары украиналық ұшқышсыз ұшу аппараттарының нысанасына айналғанын хабарлады.
Беглов бірнеше нысанның зақымданғанын атап өтті. Бірақ нақты қайсысы екенін нақтылаған жоқ.
«Қазіргі уақытта қалпына келтіру жұмыстары жалғасып жатыр. Бірнеше адам жараланды. Қаза тапқандар жоқ», – деді ол.
