Иранның Ислам революциясы сақшылары корпусы дүйсенбі күні АҚШ күштері Ормуз бұғазына жақындауға немесе кіруге әрекет жасаса, соққыға ұшырайтынын ескертіп, аймақтағы шиеленісті одан әрі арттырды.
Иран мемлекеттік телеарнасы таратқан мәлімдемеде «Кез келген шетелдік қарулы күштер, әсіресе басқыншы Америка күштері Ормуз бұғазына жақындауға немесе кіруге әрекет жасаса, шабуыл жасалатынын ескертеміз», – делінген.
Мәлімдемеге сәйкес, бұғаздан өту кез келген жағдайда Тегеранның келісімі арқылы жүзеге асуы тиіс. Сондай-ақ кемелер мен танкерлердің келісімсіз бұғаздан өтпеу керектігі айтылып, мұндай әрекет олардың қауіпсіздігіне қауіп төндіретіні ескертілді.
Бұған дейін АҚШ Орталық қолбасшылығы, АҚШ президенті Дональд Трамптың «Бостандық жобасы» аясында Америка күштері Ормуз бұғазынан еркін өтуді қалайтын коммерциялық кемелерге қолдау білдіретінін хабарлаған еді.
«X» желісінде жарияланған мәлімдемеде: «АҚШ күштері 4 мамырдан бастап Ормуз бұғазы арқылы өтетін коммерциялық кемелердің навигациялық еркіндігін қалпына келтіру үшін «Бостандық жобасын» жүзеге асырады», – делінген.
Аймақтағы шиеленіс 28 ақпанда АҚШ пен Израильдің Иранға қарсы шабуылы мен оған жауап ретінде Тегеранның Парсы шығанағындағы Израиль нысандары мен АҚШ одақтастарына қарсы қарымта соққысымен күшейе түсті.
Вашингтон 13 сәуірден бері Ормуз бұғазына бағытталған теңіз қоршауын жүзеге асырып келеді.
8 сәуірде Пәкістанның араағайындығымен екі апталық атысты тоқтату келісімі жарияланып, 11 сәуірде Исламабадта келіссөздер өтті, алайда тұрақты келісімге қол жеткізілмеді. Кейін Дональд Трамп Пәкістанның өтінішімен бітімді ұзартты.
Иранның бұл мәлімдемесі Ибрахим Азизидің ескертуінен кейін жасалды. Ол Ормуз бұғазындағы жаңа теңіз тәртібіне АҚШ-тың араласуын «атысты тоқтату режимін бұзу» деп бағалайтынын айтқан.
Азизи «X» желісіндегі жазбасында «Бұғазды Вашингтон басқарады» деген пікірді жоққа шығарып, «Ормуз бұғазы мен Парсы шығанағы Трамптың қиялға негізделген жазбаларымен басқарылмайды»,- деп мәлімдеді.
