Дүйсенбі күні таңертең жиналған ресми мәліметтерге сәйкес, Иран 28 ақпаннан бері жеті араб еліндегі АҚШ-тың базалары мен маңызды орындарын нысанаға алып, кемінде 5 471 зымыран және ұшқышсыз ұшу аппаратымен шабуыл жасаған.
АҚШ пен Израильдің Иранға қарсы шабуылдары мен Тегеранның қарымта соққылары жалғасып жатқан тұста, Парсы шығанағы елдеріндегі көптеген стратегиялық нүкте нысанаға алынды.
Шабуылдан зардап шеккен елдердің Қорғаныс министрліктері мен ресми ақпарат орталықтарынан алынған мәліметтерге қарағанда, ең көп зардап шеккен ел – Біріккен Араб Әмірліктері.
БАӘ Қорғаныс министрлігі шабуылдар басталғалы бері қорғаныс жүйелері 414 баллистикалық зымыранды, 15 қанатты зымыранды және 1 914 ұшқышсыз ұшу аппаратын жойғанын хабарлады.
Кувейттің ақпарат орталығы мен әскерінен алынған мәліметтерге сәйкес, 309 баллистикалық зымыран мен 616 ұшқышсыз ұшу аппараты жойылған.
Бахрейн Қорғаныс күштерінің бас қолбасшылығы осы кезеңде 174 зымыран мен 391 ұшқышсыз ұшу аппаратының залалсыздандырылғанын хабарлады.
Катар Қорғаныс министрлігі елге бағытталған 206 баллистикалық зымыран мен 93 ұшқышсыз ұшу аппараты шабуылын тіркегенін мәлімдеді.
Иордания армиясы қақтығыс барысында 262 зымыран және ұшқышсыз ұшу аппараты шабуылы тіркелгенін хабарлады.
Сауд Арабиясы өз аумағына кемінде 52 зымыран мен 1 006 ұшқышсыз ұшу аппараты бағытталғанын жеткізді.
Оман болса 19 ұшқышсыз ұшу аппаратының нысанасына айналғанын хабарлады.
Аймақтық шиеленіс 28 ақпанда АҚШ пен Израильдің Иранға қарсы бастаған және сол кездегі рухани көсем Аятолла Әли Хаменейді қоса алғанда 1 340-тан астам адамның қаза табуына әкелген шабуылдан кейін күшейе түсті.
Иран Израиль, Иордания, Ирак және АҚШ әскери күштері орналасқан Парсы шығанағы елдеріне зымыран және ұшқышсыз ұшу аппаратымен қарымта соққы жасады. Бұл шабуылдар адам шығынына және инфрақұрылымның күйреуіне әкелді. Сондай-ақ жаһандық нарық пен авиация саласына да кері әсер етті.
