Израиль Қорғаныс министрі Хамас бітім келісімін орындамаса геноцидті қайта бастайтындарын және армияға палестиналық тойтарыс ұйымын жою үшін жоспар дайындауды бұйырғанын айтты.
Кацтың кеңсесі сәрсенбі күні жариялаған хабарламада: «Хамас келісімді орындамаған жағдайда Израиль АҚШ-пен бірге Хамасты толығымен жеңу, Газадағы жағдайды өзгерту және соғыстың барлық мақсаттарына жету үшін қайтадан соғысты бастайды», - делінген. Кац сондай-ақ Газадағы жер асты өткелдерін жою негізгі әскери мақсаты екенін атап өтіп, Израильдің АҚШ басшылығындағы халықаралық күшпен бірге жұмыс істейтінін мәлімдеді.
Бұл мәлімдемеден бұрын Хамастың қарулы қанаты Кассам бригадасы Израильдің әуе соққылары кезінде қаза тапқан екі израильдік тұтқынның мәйітін тапсырғанын хабарлаған болатын.
Палестина ұйымы қалған мәйіттерді шығару үлкен күш-жігер мен арнайы құрал-жабдықты талап ететінін және бұл істі толықтай жабу үшін жауапты қызметкерлер жұмыс істеп жатқанын айтты.
«Кез келген сәтте қайта басталуы мүмкін»
Екі тарап та АҚШ, Катар, Түркия және Мысырдың араағайындығымен орнаған бітімді сақтап қалуға тырысуда.
АҚШ президенті Дональд Трамп Вашингтонда жасаған мәлімдемесінде, егер Хамас келісімнің шарттарын орындамаса, Израильдің Газадағы қырғынды кез келген сәтте қайта бастай алатыны жөнінде ескертті. Трамп: «Израиль қаласа, екі жылға созылған соғыс кезінде-ақ Хамасты жоя алар еді», – деді. Сондай-ақ АҚШ әкімшілігінің бітімнің орындалуын мұқият бақылап отырғанын атап өтті.
Өткен апта жасалған бітім келісімі кезең-кезеңімен тұтқын алмасуды, Израиль армиясының Газадан біртіндеп шығарылуын көздейді, алайда Израиль бітімге қарамастан палестиналықтарды өлтіруді жалғастыруда.
Араағайын елдер келісімнің келесі кезеңін қамтамасыз етуге және Израильдің Газадағы геноцид соғысының қайта басталуын алдын алуға күш салып жатқанымен аймақтағы шиеленіс әлі де жоғары деңгейде қалып отыр.
