Мысыр Біріккен Ұлттар Ұйымының Қауіпсіздік Кеңесін Газаға халықаралық бейбітшілікті сақтау күштерін жіберу үшін шұғыл әрекет етуге шақырды және бұл мәселеде кешігудің АҚШ қолдайтын бейбіт жол картасына қауіп төндіруі мүмкін екенін ескертті.
Мысыр Сыртқы істер министрі Бедир Абдулати дүйсенбі күні Біріккен Араб Әмірліктерінің «The National» газетіне берген сұхбатында Каирдің қираған аймақта гуманитарлық көмекті үйлестіру және қайта қалпына келтіру үдерісін қадағалау үшін халықаралық тұрақтылық күші мен «Бейбітшілік кеңесін» құру бастамасын қолдайтынын айтты.
Бұл жоспар АҚШ президенті Дональд Трамп бастаған бастаманың бір бөлігі, яғни 10 қазандағы атысты тоқтату келісімінен кейінгі кезеңді қамтиды. Бұл үдеріс палестиналық тойтарыс тобы ХАМАС-ты қарусыздандыру мен көпұлтты күштің аймаққа орналастырылуын көздейді.
Абдулати Газаның Палестинаның қарамағында қалуы тиіс екенін атап өтіп, БҰҰ қарарының бейбітшілік күштерін заңдастырып, олардың мандатын нақтылау үшін шешуші маңызға ие екенін жеткізді.
«Мұндағы міндет - бейбітшілікті сақтау, оны күштеп орнату емес», - деді ол. Сондай- ақ құрамына Ұлыбританияның бұрынғы премьер-министрі Тони Блэр секілді тұлғалар кіруі мүмкін «Бейбітшілік кеңесі» полиция, басқару және халықаралық гуманитарлық көмектердің жеткізілуін ұйымдастыруға да атсалысатынын айтты.
АҚШ әкімшілігі өңірдегі тұрақсыздыққа алаңдаулы. АҚШ вице-президенті Джей Ди Вэнс Израильге соңғы сапарын Нетаньяхудың атысты тоқтату келісімін бұзып, соғысты қайта бастау ықтималдығына байланысты жүзеге асырды.
