Қытай Ұлыбританияға «қатаң наразылық» білдірді, себебі Ұлыбритания Ресейдің энергетика секторын қолдағаны және Мәскеудің қорғаныс секторына қажетті жабдықтарды жеткізгені үшін Қытайдың 11 компаниясына санкция салғанын жариялады.
Ұлыбританиядағы Қытай елшілігінің өкілі «Қытай бұл санкцияларға қарсы», – деп, Лондонды санкцияларды «дереу» алып тастауға шақырды.
Сәрсенбі күні Ұлыбритания Ресейге қарсы қысымды күшейту мақсатында ресейлік және қытайлық компанияларға санкция салған болатын. Бұл әрекет Украинадағы соғысқа байланысты жасалған.
Ұлыбританияның Қаржы министрі Рейчел Ривз Үндістан мен Қытайдағы компаниялардың жаһандық нарықтарға ресейлік мұнайдың ағымын жалғастыруына ықпал еткенін айтып, үкіметтің «нысаналы» әрекет жасап жатқанын мәлімдеді.
Бейжің Ұлыбританияның санкцияларын халықаралық құқыққа негізделмеген біржақты әрекеттер деп атады.
Елшілік өкілі бұл санкциялар Қытай кәсіпорындардың заңды құқықтары мен мүдделеріне нұқсан келтіретінін айтты.
«Украина дағдарысы бойынша Қытай объективті және бейтарап ұстанымды сақтап, бейбіт келіссөздерді ілгерілетуге адал болып, қос мақсатты тауарлардың экспортын заңдар мен ережелерге сәйкес қатаң реттеп келеді», – деді өкіл.
Елшілік “Қытай мен Ресей кәсіпорындары арасындағы қалыпты сауда мен ынтымақтастыққа кедергі жасалмауы немесе әсер етпеуі тиіс”, деп мәлімдеді. Бейжің сонымен бірге «кінәні басқаға аудару немесе қаралау әрекеттерін еш қабылдамайды» деп қосты.
«Біз Ұлыбританияны өз қателігін дереу түзетуге және тиісті Қытай компанияларына қарсы санкцияларды алып тастауға шақырамыз. Қытайдың мүдделеріне зиян келтіретін кез келген әрекетке қатаң жауап беріледі», – деді өкіл.
