Польша әскери полициясы белгісіз дронның шектеулі әуе кеңістігіне кіріп, елдің солтүстік-шығысындағы бір әскери нысанның аумағында оқ-дәрі қоймасынан небәрі бірнеше метр қашықтықта құлағанын тексеріп жатыр.
Оқиға 28 қаңтарда Варшавадан шамамен 90 шақырым солтүстікте орналасқан Пшасныш қаласындағы 2-радиоэлектрондық орталықта болды. “Radio Zet” мәліметінше, кезекші қызметкер дронның база үстінде ұшып жүргенін көрген, кейін аппарат басқарудан шығып, қару-жарақ сақталатын аумақтың маңына құлаған.
Әскери қызметкерлер дронды қауіпсіз күйге келтіріп, тексеру үшін әскери ғимаратқа жеткізді.
Ұқсас оқиғалар
Бұл оқиға әсіресе Ресейдің Украинаға қарсы соғысы және арзан дрон технологиясының таралуынан кейін Польшада және жалпы НАТО аумағында әскери және инфрақұрылым нысандары маңындағы рұқсатсыз дрон әрекеттеріне қатысты алаңдаушылықтың артқанын көрсетеді.
Осындай жағдайлар Германия мен Балтық елдерінде де тіркелген. Қауіпсіздік қызметтері оқу полигондары, порттар мен энергетикалық нысандар маңында бірнеше рет байқалған, тегі анықталмаған аппараттарды зерттеуде. Бұл жағдай барлау жүргізу және қорғаныс желілерін тексеру қаупі жөніндегі алаңдаушылықты күшейтті.
Польша билігі әзірге Пшасныштағы оқиғаның қасақана жасалғанына дәлел жоқ екенін айтқанымен, оператордың қателігі, техникалық ақау немесе әдейі барлау жүргізу нұсқаларын қарастыруда.
