Жергілікті билік өкілдері Ресейдің Киевке зымырандық шабуыл жасағанын хабарлады. Бұл шабуыл Зеленскийдің АҚШ президенті Дональд Трамппен және еуропалық көшбасшылармен сөйлесуінен бірнеше сағат өткен соң болып, тұрғындарға паналау орындарына бару туралы ескерту жасалды.
Украинаның көптеген өңірінде әуе шабуылы қаупі туралы дабыл жарияланды. “Reuters” агенттігінің тілшісі Киевте жарылыстардың болғанын хабарлады, ал елдің солтүстік-шығысындағы Сумы қаласының билігі дрон шабуылы салдарынан бір адамның қаза тапқанын мәлімдеді.
Киев қалалық әскери әкімшілігінің басшысы Тимур Ткаченко бейсенбі күні таңертең “Telegram” желісінде: «Жау астанаға баллистикалық зымырандармен соққы беруде. Әуе дабылы аяқталғанға дейін қауіпсіз жерлерде болыңыздар!» деп жазды.
Зеленский Францияда өткен кездесулерден кейін Трамппен және Франция президенті Эммануэль Макронмен сөйлескенін айтты. Ол бұл әңгімені Ресейдің Украинаға қарсы төрт жылдан астам уақыт бойы жүргізіп келе жатқан соғысын тоқтатуға бағытталған «үйлестіру кездесуі» деп сипаттады.
Киевке жасалған бұл шабуыл Ресейдің осы аптадағы екінші ірі әуе соққысы болды.
Украинаның рухани және мәдени мұрасын бейнелейтін мың жылдық монастырь дүйсенбі күні болған ауқымды шабуыл кезінде қатты зақымданды.
Сәрсенбі күні Трамп Ресейдің Украинаға қарағанда көбірек әскери қызметкерінен айырылғанын айтты. Ол сондай-ақ Ресей президенті Владимир Путин мен Украина президенті Зеленскийдің соғысқа қатысты қандай да бір шешім табуға дайын көрінетінін мәлімдеді.
Кремль осы аптада жасаған мәлімдемесінде Путиннің Трамппен соңғы телефон әңгімесі барысында Зеленскиймен кездесу мүмкіндігі талқыланбағанын хабарлады. Ресей тарапы бұл соғыста ұтылып жатқан жақ Украина екенін алға тартады.
Ресей бақылауындағы Запорожье атом электр станциясының қызметкерлерінің көпшілігі тұратын Энергодар қаласында Ресей тағайындаған әкім Максим Пухов “Telegram” арқылы украиналық шабуылдар салдарынан бір адамның қаза тауып, төрт адамның жараланғанын хабарлады.
Ресейдің Белгород облысында да жергілікті билік украиналық дрон шабуылы нәтижесінде бір адамның көз жұмғанын мәлімдеді.
Сәрсенбі күні Мәскеу Беларусь студенттерін тасымалдаған автобусқа шабуыл жасалғанын мәлімдеді. Алайда Киев бұл айыптауды «жалған ақпарат» деп атады.
Ростов облысының губернаторы Юрий Слюсарь “Telegram”-дағы жазбасында дрон шабуылы салдарынан бір адамның қаза тауып, екі адамның жараланғанын, сондай-ақ Ресейдің оңтүстігіндегі екі коммерциялық нысанда өрт шыққанын хабарлады.
Слюсарьдың айтуынша, Гуково қаласына жасалған дрон шабуылы кезінде бір локомотив зақымданған. Әуе қорғаныс жүйелері шабуылды тойтару жұмыстарын жалғастырып жатыр.
