АҚШ президенті Дональд Трамп Францияның Эвиан-ле-Бен қаласында өткен «G7» саммиті аясында Украина президенті Владимир Зеленскиймен кездесті.
Кездесуден кейін Зеленский «Telegram» желісінде сурет жариялап, «Ұстанымдарымызды әрдайым бір арнаға тоғыстырып отырудың маңызы зор», - деп жазды.
Келіссөзге АҚШ мемлекеттік хатшысы Марко Рубио мен Украина Ұлттық қауіпсіздік және қорғаныс кеңесінің хатшысы Рүстем Умеров те қатысты.
Зеленский кездесудің мазмұны туралы толық ақпарат бермеді. Ал Трамп Катар Әмірі Шейх Тамим бен Хамад Әл Танимен кездесуі кезінде журналистерге Зеленскиймен кездесудің өте жақсы өткенін айтты.
Бейбітшілікке басымдық берілді
Саммит аясында АҚШ мемлекеттік хатшысы Марко Рубио мен Украина Сыртқы істер министрі Андрей Сыбига да екіжақты кездесу өткізді.
Кездесуден кейін Сыбига әлеуметтік желідегі парақшасында АҚШ-тың Иранмен қол жеткізген келісімін құттықтап, «Бұл қадам өңірге қауіпсіздік, ал энергетикалық нарыққа тұрақтылық әкеледі деп үміттенеміз», - деп жазды.
Сыбиганың айтуынша, аталған келісім Ресей-Украина соғысын тоқтатуға бағытталған АҚШ-тың бейбітшілік бастамаларына жаңа серпін беруі мүмкін. Сондай-ақ ол кездесуде майдандағы соңғы жағдай мен соңғы шабуылдар талқыланғанын айтты.
«Күшке негізделген бейбітшілікке қарай ілгерілеудің күшейіп келе жатқанын көріп отырмыз. Бұл үдерісте АҚШ-тың мықты көшбасшылығы мен табандылығына сенім артамыз», – деді Сыбига.
