Жоғары лауазымды үкімет өкілінің айтуынша, Пентагон Иранға қарсы соғысты қаржыландыру үшін Ақ Үйден 200 миллиард доллардан астам қаражат сұраған.
«The Washington Post» хабарлағандай, бұл ірі қаржылық сұраныс Конгресте айтарлықтай қарсылыққа тап болуы мүмкін.
Бұл сұраныс көлемі қазіргі әуе шабуылдарының шығындарынан асып түседі және соғыста қолданылатын маңызды қару-жарақ өндірісін арттыруға бағытталады.
Қорғаныс министрлігі соңғы үш аптада АҚШ пен Израиль күштері мыңдаған нысанға соққы жасағаннан кейін азайған оқ-дәрілерді толықтыру үшін ауқымды қаржылық көмек сұраған.
Ақ Үйдің Конгрестен нақты қанша қаражат сұрайтыны әзірге белгісіз. Кейбір шенеуніктер Пентагонның бұл өтінішінің Конгрестен өту мүмкіндігі төмен деп санайды.
Шенеуніктердің айтуынша, министрлік соңғы апталарда жалғасып жатқан талқылаулар аясында түрлі ұсыныс жасаған.
Cаяси күрес
Бұл сұраныс соғысқа қоғам қолдауы шектеулі әрі демократтар тарапынан қатаң сынға ұшыраған Конгресте үлкен саяси күреске себеп болуы мүмкін.
Республикашылдар қосымша қаржыландыруды қолдайтындарын білдірді.
Дональд Трамп АҚШ-тың шетелдегі қақтығыстарға қатысуын азайту уәдесімен сайлауалды науқан жүргізіп, Конгрестің Украинадағы соғысқа шамамен 188 миллиард доллар көлеміндегі бұрынғы шығындарын сынға алған болатын.
Шенеуніктердің айтуынша, Ирандағы соғыстың шығыны артқан. Тек алғашқы аптаның өзінде 11 миллиард доллар жұмсалған.
АҚШ пен Израильдің Иранға қарсы бірлескен шабуылдары басталғаннан кейін әкімшілік қосымша қаржыландыру сұранысын әзірлеуге кірісті.
Пентагон ішінде бұл бастаманы Қорғаныс министрінің орынбасары Стивен Файнберг басқарды. Ол АҚШ-тың қорғаныс өнеркәсіптік базасын кеңейтуге және маңызды қару жүйелері бойынша өндірістік қуатты арттыруға назар аударды.
Шенеуніктер ұсыныстардың оқ-дәрі тапшылығын жоюға және өндірісті жеделдетуге бағытталғанын айтса, сарапшылар жұмыс күші, өндірістік нысандар мен материалдық ресурстардың шектеулігіне байланысты өндірісті кеңейту уақыт алатынын ескертті.
Дональд Трамп соғыс басталмай тұрып-ақ 1,5 триллион долларлық қорғаныс бюджетін ұсынды, алайда бұл бастама Ақ Үйдің Басқару және бюджет кеңсесінде тым жоғары деп бағаланып, қабылданбады.
Сондай-ақ заң шығарушылар соңғы қаржыландыру пакетіне барлау операцияларына қосымша қаражат енгізу мәселесін де көтерді.
