ХАМАС барлық палестиналық топпен ұлттық диалогқа кірісетінін жариялады. Тойтарыс тобы бұл мәлімдемені делегациясы мен ФАТХ тобының өкілдері арасында Мысырдың араағайындығымен Каирде өткен кездесумен қатар жасады. Кездесуде Газа бітімінің екінші кезеңі мен аймақтың болашағы талқыланды.
ХАМАС өкілі Хазем Касым Анадолы агенттігіне берген сұхбатында қозғалыстың Палестина әкімшілігі мен өзге де ұлттық күштерге шын жүрекпен ұлттық диалогқа бет алғанын айтып, әкімшіліктің ескерусіз қалдыруға болмайтын палестиналық құрылымдардың бірі екенін атап өтті.
Касым билік өкілдерін Газадағы қазіргі ұлттық келісімге бейімделіп, диалогқа ашық оймен келуге шақырды және қазір ұлттық бірлік уақыты, партиялық мүдделерден гөрі ұлттық мүдделердің үстем болуы қажет екенін айтты.
Сондай-ақ ол қазіргі кезең тек ХАМАС үшін емес, Газа мен Батыс Шериядағы бүкіл палестина халқы үшін қауіпті екенін ескертті.
ХАМАС өкілі қозғалыстың Газа бітімін толық орындауға ниетті екенін қайталап, араағайын елдерді Израильдің келісімді сақтауын қамтамасыз ету үшін қысым жасауға шақырды.
Касымның айтуынша, ХАМАС келісімді аяқтау үшін тәулік бойы келіссөз жүргізіп, келісілген мәселелерді іске асыру жолында нақты қадам басқан.
Оның мәліметінше, Түркия, Мысыр және Катар нақты кепілдік, ал АҚШ тікелей уәде берген. Бұл кепілдіктер соғыстың іс жүзінде аяқталғанын және келісім шарттардың орындалуы осы соғыстың толықтай біткенін білдіреді.
ХАМАС өкілі топтың алғашқы кезеңді тірі қалған тұтқындар мен қаза тапқандардың мәйітін тапсыру арқылы аяқтағанын, қалғандарын қайтару үшін жұмыс істеп жатқанын жеткізді.
Екінші кезең
Касым екінші кезеңге қатысты араағайын елдермен қосымша талқылау мен нақты түсіндірулер қажет екенін айтып, бұл кезеңнің «кең ауқымды тақырыптар мен егжей-тегжейлі тәсілді талап ететін күрделі мәселелерді қамтитынын атап өтті.
Ол ХАМАС қозғалысының басты мақсаты - Газадағы соғысты толық әрі түбегейлі тоқтату екенін баса айтты.
Сондай-ақ араағайын елдерге Израильдің заң бұзушылықтары туралы ақпарат беруді жалғастырып жатқанын жеткізді. Оның айтуынша, Израиль бітім күшіне енгеннен бері 90 палестиналықты өлтірген. Рафах шекара өткелін жабық ұстап, гуманитарлық көмектің кіруіне кедергі келтіріп отыр.
Топ өкілі Израильді «гуманитарлық жағдайларды саяси саудаласу құралы ретінде пайдаланып отыр» деп айыптап, бұл тәсілдің Израильдің Газаға жылдар бойы қолданған саясатының жалғасы екенін айтты.
Сондай-ақ ол Газада аштық қаупін болдырмау және гуманитарлық көмекті шұғыл жеткізу үшін дереу әрекет етуге шақырды.
