АҚШ пен Израильдің Иранға бағытталған шабуылдары жалғасып жатқан тұста Түркия Таяу Шығыста артқан шиеленістің бүкіл өңірге таралуы мүмкін екенін ескертіп, дипломатияға қайта назар аударуға шақырды.
Түркия Ұлттық қорғаныс министрлігінің Баспасөз және қоғаммен байланыс жөніндегі кеңесшісі Зеки Актүрік бейсенбі күні жасаған мәлімдемесінде Израиль мен АҚШ-тың Иранға қарсы шабуылдарымен басталған, Иранның Израильге қарымта соққысы және Парсы шығанағындағы АҚШ-тың әскери әрі қаржылық нысандарын нысанаға алуымен ушыққан соғыстың әлі де өңірге таралу қаупі бар екенін айтты.
Актүрік: «Барлық дау халықаралық құқық негізінде, диалог пен дипломатия арқылы шешілуі тиіс. Бұл бағыттағы табанды ұстанымымыз бен күш-жігеріміз жалғасуда. Өңіріміздің тыныштығы мен тұрақтылығына нұқсан келтіретін қақтығыстардың мүмкіндігінше тезірек тоқтатылуын қалаймыз», - деді.
Израиль шабуылдарына айыптау
Актүрік Ливан, Сирия және Палестинаны қоса алғанда, бірнеше бағытта жалғасып жатқан Израильдің әскери шабуылдарын айыптады. Оның айтуынша, Израильдің Ливандағы әрекеттері халықаралық және гуманитарлық құқықты бұзады. Сондай-ақ бұл шабуылдар БҰҰ-ның үш қызметкерінің қаза табуына себеп болғанын еске салды.
Актүрік бұдан бөлек, Израиль Сирияның оңтүстігіне бағытталған шабуылдар арқылы елдің егемендігі мен аумақтық тұтастығын бұзуды жалғастырып отырғанын, сондай-ақ басып алынған Батыс Шерияда заңсыз қоныстану әрекеттерін жүргізіп жатқанын және Газаға шабуылдарын тоқтатпағанын атап өтті.
БҰҰ-ға үндеу: «Жауапкершілік алыңыздар»
Халықаралық қауымдастықты әрекет етуге шақырған Актүрік: «Халықаралық жүйенің заңдылығына және халықаралық құқыққа деген сенімге одан әрі нұқсан келмеуі үшін, ең алдымен БҰҰ-ны қоса алғанда, бүкіл халықаралық қауымдастықты Израильдің агрессиясын тоқтату бағытында жауапкершілік алуға шақырамыз», – деді.
Сондай-ақ ол Түркия Қарулы Күштері Бас штабының бастығы, армия генералы Селчук Байрактароглуның бейсенбі күні Ливия Құрлық әскерлері қолбасшысын қабылдауы жоспарланғанын мәлімдеді.
