Еуропаның Түркиясыз сенімді қауіпсіздік архитектурасын құра алмайтынын айтқан президент құрлықтың қорғаныс және қауіпсіздік құрылымдарына Анкараны тарту қажеттігін мәлімдеді.
Сәрсенбі күні Эфиопиядан қайтар жолда журналистерге сұхбат берген Ердоған Еуропа Түркиямен тығыз интеграцияға кедергі келтіріп отырған идеологиялық тосқауылдарды еңсеруі тиіс екенін атап өтті. Ол түрік армиясының Солтүстік атлантикалық келісім ұйымы құрамындағы ең қабілетті күштердің бірі екенін баса айтты.
Президенттің айтуынша, кез келген еуропалық қауіпсіздік архитектурасы Түркиясыз толыққанды бола алмайды. «Егер Еуропа жаңа қорғаныс жүйесін құруды көздесе, Түркиясыз қалыптасатын құрылымның жеткіліксіз болатыны анық», - деді ол. Сондай-ақ Анкараның салалық мүмкіндіктері оның тек келіссөз үстеліндегі серіктес емес екенін дәлелдейтінін атап өтті.
Африкамен қарым-қатынас
Эфиопияға жасаған сапарына тоқталған президент Аддис-Абебаны Африкамен кең ауқымды ынтымақтастықты дамыту үшін маңызды қақпа ретінде сипаттады. Ол Түркияның өңірлік сенім қалыптастырудағы рөліне, соның ішінде Эфиопия мен Сомали арасындағы араағайындық күш-жігеріне назар аударды.
Ердоған Түркияның Африкаға қатысты саясаты қанауға емес, өзара құрметке негізделген ұзақ мерзімді әріптестік түсінігіне негізделетінін айтты. «Түркияның Африкада отаршылдық өткені жоқ», - деген ол тең құқықты серіктестік пен гуманитарлық дипломатия ұстанымы елдің құрлықтағы беделін күшейтіп отырғанын атап өтті.
Сирия мен Ирандағы тұрақтылық
Сирия мәселесіне қатысты президент Ердоған террорсыз Түркия және террорсыз аймақ стратегиясы аясындағы үдерістің сақтықпен, табанды түрде ілгерілеп жатқанын айтты. Оның сөзінше, Сириядағы өзгерістер Анкараның қауіпсіздік басымдықтарын көрсете бастады.
Ердоған түрік мекемелерінің интеграциялық үдерістерді жіті бақылап отырғанын атап өтіп, радикализмге қарсы күрес тек қауіпсіздік шараларымен шектелмей, оның құқықтық және саяси түпкі себептеріне де назар аударылып отырғанын жеткізді.
Иран мен АҚШ арасындағы шиеленіске қатысты ол Анкараның екі тараппен де байланыста екенін және әскери эскалацияға қарсы екенін мәлімдеді. Ердоған Иран басшысымен де, АҚШ президенті Трамппен де жеке-жеке сөйлескенін айтып, жалғыз тиімді жол диалог екенін атап өтті.
«Иранға қарсы жаңа соғыс ешкімге пайда әкелмейді», - деген ол мұндай қадам өңірде тұрақсыздықты тереңдете түсетінін ескертті. «Дипломатия мүмкін болған жерде үміт бар», - деді Ердоған.
Түркия Газа бойынша бейбітшілік келіссөзіне қатысады
Газа мәселесіне қатысты Ердоған қақтығысты «адамзат ар-ожданының сынағы» деп бағалап, бітімге келуге, гуманитарлық көмекті үздіксіз жеткізуге және екі мемлекет негізіндегі шешім үдерісін қайта жандандыруға шақырды.
Ердоған Түркияның алдағы бейбіт бастамаларға қатысатынын мәлімдеп, Сыртқы істер министрі Хакан Фиданның Анкара атынан Газа бойынша бейбітшілік келіссөзіне қатысатынын растады.
