Израильдің мемлекеттік медиасы «KAN» сәрсенбі күні төрт тұтқынның мәйіттері қайтарылғаннан кейін Израиль Газа мен Мысыр арасындағы Рафах шекара өткелін ашу және Газаға гуманитарлық көмектің жеткізілуіне рұқсат беру туралы шешім қабылдағанын мәлімдеді.
Мәлімдемеде Израильдің ХАМАС-қа қарсы жоспарлаған және аймаққа кіретін көмек жүк көліктерінің санын екі есеге қысқартуды көздеген шараларынан бас тартқаны айтылды.
Бұған дейін, ХАМАС АҚШ-тың араағайындығымен жасалған жаңа бітім келісімі аясында тұтқындардың мәйіттерін тапсырмағандықтан Израиль Рафах шекарасын жабу туралы шешім қабылдаған болатын.
Израиль көмектің Палестина шекарасына жүк көліктерінен түсірілуін, кейін Газа аймағындағы БҰҰ мен гуманитарлық ұйымдар арқылы таратылуын талап етуде.
«UNICEF» өкілі Рикардо Пирес: «Барлық шекара өткелдері ашық болуы керек. Рафах өткелі жабық қалса, оңтүстіктегі босқындар азап шегеді», - деді.
АҚШ президенті Дональд Трамп дүйсенбі күні Израильдің Газаға қарсы соғысының аяқталғанын жариялаған болатын. Соңғы израильдік тұтқындардың палестиналық тұтқындармен алмасуы - гуманитарлық көмектің аймаққа жедел жеткізілу үмітін арттырды.
Әлемдік аштық мониторингі ұйымы жүз мыңдаған адамның аштық қаупімен бетпе-бет келгені туралы ескерту жасады.
Қызыл Крест ұйымының өкілі Кристиан Кардон сейсенбі күні Женевада өткен баспасөз мәслихатында: «Біз әлі де санаулы ғана жүк көлігінің келіп жатқанын көріп отырмыз. Бұл көліктерге қарай ағылған халықтың әрекеті гуманитарлық стандарттарға сай емес», - деді.
БҰҰ Дүниежүзілік азық-түлік бағдарламасы сейсенбі күнгі мәлімдемесінде, демалыс күнінен бері 137 гуманитарлық жүк көлігінің аймаққа кіргенін хабарлады. Көмек ұйымдары Газада бірнеше апта бойы көмек ала алмай отырған 400 мың адамға тез арада азық-түлік пен қажетті заттарды жеткізуді көздеп отыр.
