Түркия президенті Режеп Тайып Ердоған F-35 жойғыш ұшақ бағдарламасы бойынша АҚШ президенті Дональд Трамппен соңғы келіссөзде оң қадам басылғанын айтты.
Әзербайжанның Жеңіс күніне арналған шарадан оралар кезде ұшақта журналистерге мәлімдеме жасаған Ердоған Вашингтон өз міндеттемелерін орындайды деп үміттенетінін білдірді.
Ол F-35 ұшақтарын алу Түркияға өңірде күшті операциялық және технологиялық артықшылық беретініне баса назар аударды.
«Техникалық деңгейдегі келіссөздер мен ілгерілеу маңызды. Әрине F-16 және F-35 мәселелері де бар. АҚШ президенті Трамппен соңғы кездесуімізде F-35 бойынша жемісті нәтиже алдық. Уәделердің орындалуына үміт етемін және біз F-35 ұшақтарымен мықты мүмкіндіктерге ие боламыз», — деді Ердоған.
“Eurofighter”
Әуе күштерін кеңейту туралы әңгімені жалғаған Ердоған Ұлыбритания және Германиямен “Eurofighter” келісімінің жақсы қарқынмен жүріп жатқанын растады.
Ол сондай-ақ Катар және Оманмен келіссөздер жалғасып жатқанын, шығыс елдерінен қосымша “Eurofighter” сатып алу мүмкіндіктері ашылып отырғанын айтты.
«Олардың флоттарынан да “Eurofighter” алу мүмкіндігі бар. Егер осы келісімдер жүзеге асса, бұл еліміз үшін оң қадам болмақ», — деді Ердоған.
Ердоған сондай-ақ отандық қорғаныс өнеркәсібіне баса назар аударып, жергілікті бастамалардың Түркияның стратегиялық қолжетімдігін және технологиялық тәуелсіздігін одан әрі нығайтатынын атап көрсетті.
«Осы қадамдар ұлттық қорғаныс жобаларымызбен бірге Түркияға технологиялық және әуе операциялары саласында мықты мүмкіндіктер қамтамасыз етеді», — деп қорытындылады ол.
