Газа секторындағы жоғары лауазымды медицина қызметкері бітім мен тұтқындар алмасу келісімі аясында Израиль тарапынан қайтарылған палестиналық мәйіттерде азаптау мен күйік іздері бар екенін айтты.
Газа Денсаулық сақтау министрлігінің өкілі доктор Мунир әл-Бурш бейсенбі күні жасаған мәлімдемесінде: «Газа тұтқындарының денелері бізге жануарлар секілді байланған, көздері таңылған, ауыр азаптау және күйік іздерімен қайтарылды. Мұның барлығы жасырын жасалған қатыгез қылмыстардың дәлелі», - деді.
Әл-Бурш мәйіттердегі іздерді «жасырылмайтын қылмыс» деп атап, көптеген тұтқынның байланған күйінде өлтірілгенін айтты. «Кінәсіз палестиналықтардың денелері жендеттердің қатыгездігінің дәлелі болып қалды. Олар табиғи өліммен емес, байланған күйде атылып өлтірілді», - деді ол. Сондай-ақ «қылмыскерлерді жауапқа тарту үшін жедел халықаралық тергеу жүргізілуі тиіс»,- деп мәлімдеп, болған оқиғаларды «толыққанды соғыс қылмысы» деп атады.
Палестиналық тұтқындардың медиа кеңсесі қайтарылған кейбір мәйіттерден адам ағзаларының ұрланған болуы мүмкін екенін де айтты. «Деректер кейбір мәйіттерден адам мүшелерінің алынғанын көрсетеді. Бұл адамгершілікке жатпайтын, тірі де, өлі де палестиналықтарға қарсы Израильдің жүйелі түрде жасап келе жатқан қылмысының дәлелі», - делінген хабарламада.
Кеңсе медициналық және сот-медициналық деректерге сүйене отырып, қайтарылған мәйіттердің көпшілігінің қолдары кісенделген, көздері таңылған, ауыр азаптау, күйік және Израильдің броньды көліктерімен жаншылған іздері бар екенін мәлімдеді.
«Дәлелдер кейбір құрбандардың тұтқындалғаннан кейін атылғанын және халықаралық гуманитарлық құқық пен Төртінші Женева конвенциясын айқын бұзу екенін растайды», - деп қосты.
Кеңсе «қылмыскерлердің әшкереленуі және жауапқа тартылуы үшін жедел әрі тәуелсіз халықаралық тергеу жүргізілуі тиіс»,- деп үндеу жасады.
Бейсенбі күні таңертең Газа Денсаулық сақтау министрлігі Халықаралық Қызыл Крест комитеті арқылы Израильден 30 палестиналықтың мәйітін қабылдап алғанын, олардың кейбірінде зорлық-зомбылық белгілері бар екенін хабарлады.
Бітім келісімі жұма күні күшіне енгеннен бері Израиль тарапынан кемінде 120 палестиналықтың мәйіті қайтарылған.
