Медицина қызметкерлерінің хабарлауынша, Йеменнен ұшырылған дрон Израильдің оңтүстігіндегі Эйлат қаласына құлап, кемінде 50 адамды жаралаған.
Израильдің ұлттық жедел жәрдем қызметінің хабарлауынша, жараланғандардың ішінде үш адамның жағдайы ауыр.
Израильдің “Yedioth Ahronoth” газеті дронның Қызыл теңіз жағалауындағы Эйлат қаласында орналасқан туристер көп жиналатын “Mall Hayam” сауда орталығының жанына құлағанын хабарлады.
Израиль армиясы ұшқышсыз ұшақтың Йеменнен ұшырылғанын және тосқауыл қою әрекеттеріне қарамастан Эйлатқа жеткенін растады.
Хоуситтердің әскери өкілі Яхия Сарие топтың «екі ұшқышсыз ұшақ пайдаланып, арнайы әскери операция жүргізгенін» және Эйлаттағы екі Израиль нысанын көздеген дрондардың «мақсаттарына жеткенін» айтты.
Бұл шабуыл Израиль мен хоуситтер арасындағы шиеленіс жалғасып жатқан кезеңде болды.
Өткен аптада Израиль әскери ұшақтары Йеменнің жағалаудағы Ходейда қаласындағы хоусит нысандарына әуеден соққы берді.
Ал өткен айда Израильдің Йемен астанасы Санадағы шабуылы кезінде премьер-министр Ахмед әл-Рахави және тоғыз министрді қоса алғанда 12 жоғары лауазымды хоусит шенеунігі қаза тапқан болатын.
Газадағы геноцид екінші жылына таяп жатқан тұста Израиль мен хоуситтер арасындағы қақтығыс күшеюде. Йеменнің үлкен бөлігін бақылауда ұстайтын хоуситтер палестиналықтарға қолдауын білдіріп, Израильге қарсы шабуылдарын күшейтті.
