Түркия президенті Режеп Тайып Ердоған Израильдің Газа секторында «толық геноцид» жасап жатқанын айтып, бұл үшін Беньямин Нетаньяхуды тікелей жауапты деп атады.
«Басқаша түсіндіру мүмкін емес деп ойлаймын. Бұл анық геноцид. Бұл геноцидті Нетаньяху жасап отыр. Нетаньяху аяусыз геноцид арқылы ондаған мың адамды өлтірді», – деді Ердоған дүйсенбі күні Нью-Йорктегі БҰҰ Бас Ассамблеясының аясында “Fox News” арнасына берген сұхбатында.
Ол Газада 120 мыңнан астам адамның жараланғанын және Түркия көптеген жаралыны емдеу үшін қабылдағанын айтты.
«Біз бұл геноцидке толықтай қарсымыз», – деді ол.
Палестиналық тойтарыс тобы ХАМАС пен олардың тұтқындары туралы сұраққа Ердоған кінәні тек ХАМАС-қа жүктеуді дұрыс емес деп санайтынын айтты.
«Бұл біржақты қылмыс емес. Тек ХАМАС-ты айыптау дұрыс емес деп ойлаймын. Сонымен қатар Нетаньяхудың жасағандарын қалай елемеуге болады?» – деді ол.
Ол Израильді бейбіт тұрғындарға қарсы шабуыл жасады деп айыптап, былай деді: «Қару-жараққа келгенде, ХАМАС-ты Израильмен салыстыруға болмайды, ал Израиль күшін аяусыз пайдаланып жатыр, 7 жастан 70 жасқа дейінгі балалар, әйелдер, қарттар, ешкімді аямайды».
Қақтығысты тоқтату мүмкіндігіне Ердоған күмәнмен қарап, оны шешілмеген Ресей-Украина соғысымен салыстырды. «Есіңізде болса, (АҚШ Президенті) Дональд Трамп ‘Мен Ресей-Украина соғысын тоқтатамын’ деді. Соғыс аяқталды ма? Әлі жалғасып жатыр. Сол сияқты ол ‘Мен Газадағы соғысты доғарамын’ деді. Аяқталды ма? Жоқ» деді ол.
“ХАМАС-ты террористік ұйым деп санайсыз ба?” деген сұраққа ол бұл пікірмен келіспейтінін аййтып жауап берді. «Мен ХАМАС-ты террористік ұйым деп санамаймын. Керісінше, мен оны тойтарыс тобы деп қабылдаймын... Олар өздерін қорғау үшін барын салып жатыр» деді Ердоған.
Мұсылман әлемінің Израильге қарсы бірлігі
Президент Ердоған Нью-Йорктегі Түрік үйінде (Түркеви орталығы) Кувейттің тақ мұрагері Шейх Сабах Халид әл-Сабахпен кездесті. Бұл кездесуде ол мұсылман әлемінің Израильге қарсы бірлігін жоғары бағалады.
БҰҰ Бас Ассамблеясының қарсаңында өткен бұл кездесуде екі ел арасындағы қарым-қатынас, сондай-ақ аймақтық және жаһандық мәселелер талқыланды. Ердоған Газада атысты тоқтату үшін келіссөздерді жалғастыру қажеттігін атап өтті.
Түркия мен Кувейт арасындағы қарым-қатынастарды, әсіресе сауда саласында дамыту маңыздылығын баса айтқан Ердоған екі ел ынтымақтастықты нығайту үшін жұмысын жалғастыратынын жеткізді.
Сирия мәселесіне тоқталған Ердоған елдің аумақтық тұтастығын сақтай отырып, қайта құру мен даму жұмыстарына назар аудару қажеттігін атап өтіп, Анкараның Сирияны қолдайтынын қайталады.
