Жергілікті БАҚ-тың хабарлауынша, Сирия Президенті Ахмед Шара Сирияның бірлігін сақтаудың маңыздылығын атап өтіп, кез келген бөлінудің көрші елдерге зиян тигізетіні туралы ескерту жасады.
Мемлекеттік «Al-Ikhbariya» телеарнасы Шараның Нью-Йорктегі Таяу Шығыс институтына берген сұхбатында: «Сирияның бірлігі – қауіпсіздік пен тұрақтылық саясатымыздың өзегінде тұр», – деді.
Шара Сирияның аймақтағы маңызды рөліне назар аудара отырып, «Кез келген бөліну көрші елдерге зиян тигізіп, аймақтық қауіпсіздікті бұзады», – деп қосты. Сондай-ақ сөзін «Вашингтон Сирия Демократиялық Күштерінің сириялық күштермен интеграциясына көмектесе алады» деп жалғастырды.
Оңтүстіктегі Сувейда уәлаятында болған бұрынғы қақтығыстарға тоқталған Шара: «Барлық тараптың қателіктері болды. Біз келісімді таңдадық», – деп атап өтті.
Сирия Президенті Израильмен ықтимал қауіпсіздік келісімі жөнінде дипломатиялық келіссөз жүргізіп жатқанын растап, «Израильмен жасалатын кез келген келісімнің сәтті жүзеге асырылуы аймақта бейбітшілікті нығайтуға бағытталған өзге келісімдерге негіз болады», – деді.
Шара «Израиль 1974 жылғы (бөліну) келісімінде көрсетілгендей, халықаралық күштердің орналастырылуын қабылдауы тиіс», – деп, Сирияның бұрынғы жағдайға оралуы ешкімге пайда әкелмейтінін жеткізді.
Өткен жылдың желтоқсан айында Асад режимінің құлағаннан кейін Израиль Сириядағы әскери нысандарға, жойғыш ұшақтар мен зымыран жүйелеріне және әуе қорғаныс объектілеріне жүздеген соққы жасады.
Сонымен қатар Израиль Сириямен 1974 жылы жасалған бөліну келісімін бұзып, Голан жоталарындағы буферлік аймақты басып алды.
Дамаск барлық елдерге тең қарым-қатынаста болу саясатын жалғастыруда. Шара: «Менің Нью-Йоркке сапарым – Сирияның халықаралық қауымдастыққа қайта оралуының белгісі», – деп мәлімдеді.
Сирия көшбасшысы 1967 жылдан кейін алғаш рет 22 қыркүйекте БҰҰ Бас Ассамблеясының мінберінде сөз сөйлеу үшін Нью-Йоркке барды.
