Жергілікті БАҚ-тың хабарлауынша, Беньямин Нетаньяху жуырда АҚШ-тан оралған Қарулы күштер Бас штабының бастығы Эяль Замирді қоса алғанда жоғары лауазымды шенеуніктер қатысқан қауіпсіздік жөніндегі жиын өткізген.
Израильдің мемлекеттік “KAN” телерадиокорпорациясы жексенбі күні бұл кездесуге «Моссад» барлау қызметінің басшысы Давид Барнеаның да қатысқанын хабарлады.
Аты-жөнін жарияламау шартымен “Reuters” агенттігіне пікір білдірген АҚШ-тың екі ресми өкілі Иранмен байланысты шиеленіс күшейген тұста жұма күні Пентагонда АҚШ пен Израильдің жоғары лауазымды генералдары кездескенін айтты.
Алайда олар АҚШ Қарулы күштері штаб бастықтары комитетінің төрағасы Дэн Кейн мен Эяль Замир арасындағы жабық есік жағдайында өткен кездесу туралы нақты ақпарат бермеді.
АҚШ президенті Дональд Трамп Иранды бірнеше рет қоқан-лоққы жасағаннан кейін, Вашингтон Таяу Шығыстағы теңіздегі әскери қатысуын арттырып, әуе қорғаныс жүйелерін күшейтті. АҚШ тарапы бұл қадамдардың мақсаты Иранды келіссөз үстеліне тарту екенін мәлімдеді.
Ал Иран билігі АҚШ тарапынан шабуыл жасалса, бұл өңірлік ауқымдағы қақтығысқа әкелуі мүмкін екенін ескертті.
Замирдің болжамы
Жергілікті БАҚ-тың хабарлауынша, Эяль Замир АҚШ-тың Иранға екі апта мен екі ай аралығында әскери шабуыл бастауы мүмкін деп есептейді.
Армия радиосы Замирдің жағдайды бағалау жөніндегі жиында: «Бұл — белгісіздік кезеңі», - дегенін жеткізді.
Сонымен қатар радио алдағы бірнеше күн ішінде АҚШ-тың Иранға шабуылы күтілмейтінін хабарлады.
Хабар таратушы ұйым «АҚШ барлық ақпаратты Израильмен бөліспейді және шешім қабылдау үдерістерінен оны шет қалдырып отыр» деп атап өтті. Сондай-ақ Израиль Дональд Трамптың Иранмен ядролық бағдарламаға қатысты келісімге келуі мүмкін екеніне және бұл келісім Иранның баллистикалық зымыран бағдарламасын қамтымауы ықтималдығына алаңдайтынын мәлімдеді.
Қиын келіссөздер
Қорғаныс министрі Исраэль Кацтың кеңсесі оның Вашингтондағы кездесулерінен кейін Эяль Замирмен аймақтағы жағдайды және Израиль армиясының «барлық ықтимал сценарийге қарсы операциялық дайындығын» талқылау үшін кездесу өткізгенін хабарлады.
Келіссөздерге қатысқан, аты-жөні жарияланбаған израильдік бір ресми тұлға Трамптың Иранмен қатаң келіссөздер жүргізгісі келетінін және мұның «Иранның ядролық бағдарламасының жойылуына алып келуі мүмкін» екенін айтты.
Израильдік ресми тұлғалар АҚШ-тың Иранға шабуыл жасағанын қалайтындарын тағы да қайталап, егер мұндай қадамнан бас тартылса, оның «салдары» болатынын алға тартты. Бұл салдардың бірі ретінде Иранның ядролық қару иелену жолында ілгерілеуі аталды.
Сондай-ақ Израиль тарапы Иранның ядролық зымыран бағдарламасына қатысты «алаңдаушылығын» АҚШ-тағы әріптестеріне жеткізген.
Аталған кездесуге қатысты Израиль билігі ресми мәлімдеме жасаған жоқ.
Осы арада Израильдің қаржы басылымы “The Calcalist” Иранмен ықтимал соғыстың құны 10 миллиард долларға дейін жетуі мүмкін деп болжайды.
