Сәрсенбі күні мұнай бағасы АҚШ-тың Иран порттарына блокаданы ұзартуы мүмкін деген хабарлардан кейін артты. Бұл жағдай Таяу Шығыстағы негізгі мұнай өндіруші аймақтан жеткізілімнің тоқтауы ұзаққа созылуы мүмкін деген алаңдаушылықты күшейтті.
«The Wall Street Journal» басылымының хабарлауынша, АҚШ президенті Дональд Трамп көмекшілеріне Иранға қарсы блокаданы ұзартуға дайындық жүргізуді тапсырған.
Хабарға қарағанда, Дональд Трамп Иран экономикасы мен мұнай экспортына қысымды жалғастырып, Иран порттарының қозғалысын шектеу арқылы бақылауды күшейтпек.
Маусым айына арналған «Brent» мұнайының келісімшарт бағасы «GMT» уақытымен 01:54-те барреліне 52 центке яғни 0,47%-ға өсіп, 111,78 долларға жетті. Осылайша баға сегіз күн қатарынан өсім көрсетті. Ал шілде келісімшарттары қазірдің өзінде 0,4%-ға өсіп, 104,84 доллар деңгейінде саудалануда.
Маусым айына арналған АҚШ-тың Батыс Техас шикі мұнайы келісімшарт бағасы алдыңғы сессияда 3,7%-ға өскеннен кейін тағы да барреліне 57 центке яғни 0,57%-ға қымбаттап, 100,50 долларға жетті. Осылайша соңғы сегіз күннің жетеуінде өсім көрсетті.
«Мұнай бағасының өсуі бұғаздағы қоршаумен байланысты. Егер Дональд Трамп блокаданы ұзартса, жеткізілім тоқтап, баға одан әрі көтеріледі»,- деді «Haitong Futures» компаниясының сарапшысы Ян Ань.
28 ақпанда басталған АҚШ–Израиль–Иран қақтығысында атысты тоқтату жарияланғанымен, тараптар толық бейбіт келісімге келе алмады. Осы арада Иран жаһандық мұнай мен сұйытылған газдың шамамен 20%-ы өтетін Ормуз бұғазында кеме қозғалысын шектеді, ал АҚШ Иран порттарына қысымды күшейтті. Бұл жағдай дағдарысқа әкеліп отыр.
АҚШ Иранның ядролық бағдарламасын тоқтатуды талап етсе, Тегеран өтемақы, санкцияларды жеңілдету және Ормуз бұғазында бақылау орнатуды сұрап отыр.
Бұғаздағы шектеулер әлемдік қордың азаюына ықпал етуде. Нарықтағы дереккөздердің мәліметінше, Америка мұнай институты АҚШ-тағы мұнай қорлары қысқарғанын хабарлаған.
24 сәуірде шикі мұнай қоры 1,79 млн баррельге азайған. Бензин қоры 8,47 млн баррельге, ал дистиллят отын қоры 2,60 млн баррельге төмендеген.
