Йемендегі хоуситтер қозғалысы теңіз бағыттарына жасалатын шабуылдарды күшейтіп, зымырандық операцияларды қайта бастайтынын мәлімдеді. Топ бұл әрекеттердің Таяу Шығыста күшейіп жатқан өңірлік қақтығыстармен тікелей байланысты екенін атап өтті.
Хоуситтер дүйсенбі күні жасаған мәлімдемесінде Қызыл теңізде Израильдің теңіз қатынасына «толық әрі жан-жақты тыйым» салатынын жариялап, Израильмен байланысы бар кемелер қайтадан нысанаға алынатынын ескертті.
Сондай-ақ олар Израильдің Яффа ауданындағы өздері «маңызды нысандар» деп атаған объектілерге зымыранмен соққы бергенін және шабуылдардың мақсатына дәл жеткенін мәлімдеді.
«Шиеленіске шиеленіспен жауап береміз»
Хоуситтердің хабарлауынша, бұл шабуылдар Израильдің Иран, Палестина, Ливан, Ирак және Йеменге қарсы әрекеттеріне жауап ретінде жасалған.
Топтың мәлімдемесінде әскери операциялардың аймақтағы жағдайдың дамуына қарай күшейтілетіні де айтылды.
«Шиеленіске шиеленіспен жауап беретінімізді тағы да растаймыз», – делінген мәлімдемеде.
Израиль билігі бұл мәлімдемелерге қатысты әзірге түсініктеме берген жоқ. Алайда Израиль БАҚ-тарының хабарлауынша, Йеменнен ұшырылған зымыран әуе қорғаныс жүйелері арқылы жойылғаннан кейін елдің әуе кеңістігі уақытша жабылған.
Аймақтағы жағдай Израильдің жексенбі күні Бейруттың оңтүстігіне жасаған шабуылынан кейін күрт шиеленісе түсті. Бұдан соң Иран Израильдің солтүстігіне қарай зымыранмен жаппай шабуыл ұйымдастырды.
Сонымен қатар Израильдің Иранның батыс және орталық өңірлеріндегі нысандарға соққы бергені хабарланды. Тегеран, Исфахан және Тебриз қалалары және тағы бірнеше жерде жарылыс болғаны білдірілді.
