Ресейдің мемлекеттік ядролық энергетика корпорациясы «Росатом» құрамындағы “FESCO” компаниясына тиесілі «Янина» контейнерлік кемесі Қаратеңізде ұшқышсыз ұшу аппараттарының шабуылына ұшырағаннан кейін суға батқаны, ал 17 экипаж мүшесінің түгел құтқарылғаны хабарланды.
«Росатомның» бас директоры Алексей Лихачев мәлімдемесінде «Янина» контейнерлік кемесіне жасалған шабуылға қатысты мәлімет жариялады.
Лихачевтің айтуынша, кеме Қаратеңізде екі дронның шабуылына ұшыраған.
«Кеме халықаралық суларда мұздатылған азық-түлік, құрылыс және әрлеу материалдары сияқты азаматтық мақсаттағы жүктерді тасымалдап бара жатқан. Бұл шабуылды қарақшылық пен теңіз қарақшылығынан басқа ештеңе деп бағалау мүмкін емес», – деді ол.
Лихачевтің айтуынша, суға бата бастаған кемеден 17 экипаж мүшесінің барлығы құтқарылған.
Оның мәліметінше, экипаждың 16 мүшесін Мысыр азаматы басқаратын “Delphinus” кемесі құтқарған. Ал соңғы экипаж мүшесі Ресейдің Қаратеңіз флотының теңіз авиациясы бөлімшелері арқылы жағалауға жеткізілген.
Бұған дейін Украина президенті Владимир Зеленский Ресейдегі үш түрлі мұнай өңдеу зауытына және Ресей туы астында жүзетін “Янина” контейнерлік кемесіне шабуыл жасалғанын хабарлаған болатын.
Ұзындығы шамамен 140 метр, ені 22 метр “Янина” кемесі 13 мың тонна жүк көтере алады.
Ресейдің Владивосток портына тіркелген кеме Үндістан, Біріккен Араб Әмірліктері және Новороссийск бағыты бойынша қатынап жүрген.
