Франция Гренландияда оқу-жаттығу өткізеді

Франция Дания және өзге де бірнеше еуропалық елмен бірлескен «суық ауа райы» жаттығуына қатысу үшін Гренландияға әскер жіберетінін мәлімдеді. Ал АҚШ президенті Дональд Трамп Гренландияны Ресей мен Қытайдан қорғау үшін Данияға сенуге болмайтынын жеткізді.

Франция Қарулы күштер министрлігінің мәліметінше, жаттығуға таулы жердегі ұрысқа маманданған бөлімшелер қатысады. Әскер саны мен өкілеттіктеріне қатысты егжей-тегжейлі мәліметтер бейсенбі күні Францияның оңтүстігіндегі Истр әуе базасында президент Эммануэль Макронның қарулы күштерге арналған жыл сайынғы үндеуі кезінде жарияланбақ.

Бұған дейін Дания оқу-жаттығу шараларына байланысты әскер енгізу арқылы Гренландиядағы әскери тұғырын бүгіннен бастап күшейтетінін мәлімдеген еді.

Швеция да өңірге офицерлер жібергенін және олардың осы әскери жаттығуға қатысып жатқанын хабарлады.

Сондай-ақ Германия Данияға қолдау көрсету үшін басқа еуропалық серіктестерімен бірге бейсенбіден сенбіге дейін өтетін барлау миссиясы аясында Гренландияға әскер жіберетінін мәлімдеді.

Трамп Данияның Ресей мен Қытайға қарсы тұра алмайтынын алға тартуда

АҚШ президенті Дональд Трамп Гренландия Ресей мен Қытайдан төнетін қауіпке қарсы «АҚШ бақылауында» болуы тиіс екенін алға тартуда.

Трамп Ақ Үйде журналистерге «Дания өзін-өзі қорғай алатынына сенбеймін. Ол жаққа қосымша шана тобын қойды. Өткен ай екінші шана тобын жіберді, бірақ бұл көмектеспейді. Ұлттық қауіпсіздік үшін бізге Гренландия керек, енді не боларын көреміз. Егер біз кірмесек, Ресей кіреді, Қытай кіреді. Дания ештеңе істей алмайды, ал біз қажеттінің бәрін істейміз», - деді.

Бұл мәлімдеме Джей Ди Вэнс пен мемлекеттік хатшы Марко Рубио, сондай-ақ Данияның Сыртқы істер министрі Ларс Локке Расмуссен және Гренландияның Сыртқы істер министрі Вивиан Моцфельдт Ақ Үйде кездесу өткізгеннен кейін жарияланды.

Расмуссен кездесу соңындағы баспасөз мәслихатында «Американың ұстанымын өзгерте алмадық. АҚШ президентінің Гренландияны жаулап алуға ниетті екені анық. Мұның корольдіктің (Данияның) мүддесіне сай келмейтінін нақты айттық», - деді.

Оның айтуынша, Дания мен АҚШ шешім табу үшін жоғары деңгейдегі жұмыс тобын құру жөнінде келісімге келген.